Կրեմլը հայտարարել է, որ Պուտին-Զելենսկի հանդիպում մինչև օգոստոսի վերջ դժվար թե հնարավոր լինի

Կրեմլում կարծում են, որ Ռուսաստանի և Ուկրաինայի նախագահների հանդիպումը, ինչպես առաջարկում է Կիևը, քիչ հավանական է, որ տեղի ունենա մինչև օգոստոսի վերջ, փոխանցում է Meduza-ն։

«Բարձր մակարդակի հանդիպումը կարող է և պետք է վերջ դնի կարգավորմանը և ամրագրի այս համաձայնագրերի ձևաչափերը, որոնք պետք է մշակվեն փորձագիտական աշխատանքի ընթացքում։ Հակառակն անել հնարավոր չէ։ Հնարավո՞ր է, արդյոք, 30 օրում անցնել նման բարդ գործընթացի միջով։ Ակնհայտ է, որ դա քիչ հավանական է»,- ճեպազրույցի ժամանակ ասել է Ռուսաստանի նախագահի մամուլի քարտուղար Դմիտրի Պեսկովը։

Կրեմլի խոսնակը նաև նշել է, որ Ռուսաստանի և Ուկրաինայի պատվիրակությունների կողմից բանակցությունների երկրորդ փուլում փոխանակված հուշագրերի նախագծերը «տրամագծորեն հակառակն» են։

«Քիչ հավանական է, որ դրանք կարելի է մեկ գիշերվա ընթացքում մերձեցնել, դա կպահանջի շատ բարդ դիվանագիտական աշխատանք»,- հավելել է նա։

Հուլիսի 23-ին Ստամբուլում կայացած ռուս-ուկրաինական բանակցությունների երրորդ փուլից հետո Կիևի պատվիրակությունն առաջարկել է օգոստոսի վերջին անցկացնել Ռուսաստանի և Ուկրաինայի նախագահներՎլադիմիր Պուտինի և Վլադիմիր Զելենսկիի անձնական հանդիպում՝ Թուրքիայի ու ԱՄՆ նախագահներ Ռեջեփ Թայիփ Էրդողանի և Դոնալդ Թրամփի մասնակցությամբ։

Ուկրաինայի նախագահի խոսքով՝ երկար ժամանակ անց առաջին անգամ ռուս-ուկրաինական բանակցություններում Կրեմլից ազդանշաններ են հնչել առաջնորդների հնարավոր հանդիպման մասին։

«Մենք միշտ հրապարակայնորեն բարձրացնում ենք առաջնորդների մակարդակով հանդիպման հարցը։ Եվ նրանք հիմա սկսել են խոսել այս մասին մեզ հետ զրույցում։ Սա արդեն շարժում է դեպի հանդիպման որոշակի ձևաչափ»,- ուկրաինական լրատվամիջոցների հետ զրույցում ասել է Զելենսկին։

Թարգմանությունը՝ Էմմա Չոբանյանի