29.10.2026 | 17:01
Կարիերայի առաջին քայլերը՝ IDBank-ի հետ․ մեկնարկել է IDream-ի 16-րդ շրջափուլը
Քննչական կոմիտեից 590 հզ դոլար հափշտակելը կազմակերպելու մեջ մեղադրվող Գոռ Թադևոսյանի նկատմամբ տնային կալանք է կիրառվել․ գործը դատարանում է
Հասարակություն
25.07.2025 | 15:18
Քննչական կոմիտեի տնտեսական հանցագործությունների և մաքսանենգությունների քննության գլխավոր վարչության պետի նախկին ժամանակավոր պաշտոնակատար Գոռ Թադևոսյանի նկատմամբ տնային կալանք է կիրառվել։ Այս մասին Factor TV-ի հետ զրույցում ասաց Թադևոսյանի պաշտպաններից Արշակ Ղազարյանը։
Գործով մյուս մեղադրյալ Էդգար Գրիգորյանի պաշտպան Աշոտ Ապրեսյանը մեզ հետ զրույցում ասաց, որ իր պաշտպանյալի նկատմամբ դատարանը որպես խափանման միջոց է ընտրել կալանավորումը՝ 3 ամիս ժամկետով։
Նշենք, որ գործը դատարան է ստացվել հուլիսի 7-ին, մակագրվել է դատավոր Տաթևիկ Մուրադյանին։
Ըստ մեղադրանքի՝ Էդգար Գրիգորյանը նախնական համաձայնության է եկել Գոռ Թադևոսյանի հետ գումարը գաղտնի հափշտակելու, ապա՝ միմյանց միջև հավասարապես բաժանելու շուրջ։ Այնուհետև, իրենց հանցավոր դիտավորությունն իրագործելու նպատակով Գոռ Թադևոսյանը Էդգար Գրիգորյանին է տվել քննիչ Սուրեն Հակոբյանի աշխատասենյակի մուտքի դռան և չհրկիզվող պահարանի բանալիները, ինչպես նաև նույն վարչության քննիչ Արկադի Աղաջանյանի վարչության շենք մուտք գործելու անցաքարտ։ Էդգար Գրիգորյանը պատրաստել է դրանց կրկնօրինակները, և դրանք օգտագործելով, 2025 թվականի մայիսի 20-ին՝ 16:40-ի սահմաններում, ապօրինի մուտք է գործել Երևան քաղաքի Դեղատան փողոցի 3 հասցեում գտնվող ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության շենքը, որտեղ գտնվելու ընթացքում՝ գիշերային ժամի, բացել է վեցերորդ հարկում գտնվող՝ քննիչ Սուրեն Հակոբյանի թիվ 617 աշխատասենյակի դուռը, այնուհետև՝ չհրկիզվող պահարանը, որտեղից գաղտնի հափշտակել է այնտեղ պահվող քրեական վարույթով առգրավված և իրեղեն ապացույց հանդիսացող՝ առանձնապես խոշոր չափերով՝ 227.185.400 ՀՀ դրամին համարժեք՝ 590.000 ԱՄՆ դոլար գումարը և 2025 թվականի մայիսի 21-ին՝ ժամը 08։20-ի սահմաններում, գումարը պայուսակներում դուրս եկել վարչական շենքից։ Այնուհետև, հանդիպելով ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության քննիչ Սահակ Պետրոսյանին, վերջինի հարցին ի պատասխան՝ Էդգար Գրիգորյանը կատարած հանցանքն անխոչընդոտ ավարտին հասցնելու և բացահայտումից խուսափելու նպատակով, հայտնել է, որ ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչության պետերից Գոռ Թադևոսյանն իր ընկերն է, որից հետո, քննիչը նշված հանգամանքը պարզելու նպատակով զանգահարել է Գոռ Թադևոսյանին։ Գոռ Թադևոսյանը խմբի կողմից՝ նախնական համաձայնությամբ առանձնապես խոշոր չափերով` գումարի գաղտնի հափշտակությունն ավարտին հասցնելու նպատակով քննիչին հայտնել է, որ տվյալ անձն իր ընկերոջ եղբայր Արթուրն է, որից հետո Էդգար Գրիգորյանը անխոչընդոտ հեռացել է դեպքի վայրից և Գոռ Թադևոսյանի հետ նախնական համաձայնությամբ հափշտակել 590.000 ԱՄՆ դոլար գումարը։
Թե՛ Գոռ Թադևոսյանը, թե ՛ Էդգար Գրիգորյանն ընդունել են իրենց առաջադրված մեղադրանքը։ Նշենք, որ Քրեական վարույթի շրջանակներում իրեղեն ապացույց 590 000 դոլար գումարի մեծ մասը հայտնաբերվել է Էդգար Գրիգորյանի մոտ, սակայն մոտ 11 հզ դոլարը հայտնաբերել չի հաջողվել։
Գոռ Թադևոսյանի պաշտպան Արշակ Ղազարյանը Factor TV-ին ասաց, որ գումարի պակասող մասը Թադևոսյանը վերականգնել է։
Արաքս Մամուլյան
