Ուկրաինական ԱԹՍ-ները հարձակվել են Սոչիի վրա. մեկ զոհ կա․ ՏԵՍԱՆՅՈՒԹ

Ուկրաինական անօդաչու թռչող սարքերը հուլիսի լույս 24-ի գիշերը հարձակվել են Կրասնոդարի երկրամասի վրա։ Այս մասին հաղորդել է տարածաշրջանային օպերատիվ շտաբը տելեգրամի ալիքում, փոխանցում է Meduza-ն։

Իշխանությունների տվյալներով՝ Սոչիի Ադլերի շրջանի Ավիացիոն փողոցում անօդաչու թռչող սարքի բեկորների ընկնելու հետևանքով մահացել է տեղի բնակչուհի, մեկ այլ կին ծանր վիրավորվել է և հոսպիտալացվել։ Օպերատիվ շտաբը հայտնել է նաև հրդեհի մասին, որը մարվել է։

Ուկրաինական Exilenova+ տելեգրամ ալիքը հայտնել է, որ Ադլերում հարված է հասցվել Սոչիի օդանավակայանի շրջանում գտնվող նավթաբազային։ Հարվածի տակ է հայտնվել նաև Ադլերի երկաթուղային կամուրջը, տեղի բնակիչները հետևանքների տեսանյութ են հրապարակել։

Կրասնոդարի երկրամասի Սիրիուս բնակավայրում, որը գտնվում է Սոչիից 30 կիլոմետր հեռավորության վրա, հարված է հասցվել Տավրիչեսկայա փողոցում գտնվող նավթաբազային, հայտնել է բնակավայրի ղեկավար Դմիտրի Պլիշկինը:

Ռուսական Astra տելեգրամ ալիքի հաղորդմամբ՝ խոսքը «Լուկոյլ-Յուգնեֆտեպրոդուկտ» նավթաբազայի մասին է: Ուկրաինական լրատվամիջոցներն էլ հայտնել են, որ դա Ռոսնեֆտի բազան է:

Ռուսաստանի պաշտպանության նախարարությունը հայտնել է, որ գիշերվա ընթացքում ՀՕՊ ուժերը որսացել և ոչնչացրել են ուկրաինական 39 անօդաչու թռչող սարք, որոնցից 21-ը՝ Սև ծովի, 11-ը՝ Ազովի ծովի և յոթը՝ Կրասնոդարի երկրամասի տարածքի վրա։ Բացի այդ, Ռոսավիացիան գիշերը ժամանակավորապես սահմանափակումներ է մտցրել Սոչիի օդանավակայանում, որի պատճառով հետաձգվել է ավելի քան 50 չվերթ՝ 28 մեկնում և 28 ժամանում։

Թարգմանությունը՝ Էմմա Չոբանյանի