Թրամփը որոշել է ԱՄՆ-ն կրկին դուրս բերել ՅՈՒՆԵՍԿՕ-ից

ԱՄՆ-ը հայտարարել է, որ կրկին դուրս է գալիս ՄԱԿ-ի կրթական, գիտական և մշակութային գործակալությունից (ՅՈՒՆԵՍԿՕ)՝ Վաշինգտոնի կողմից նկատվող Իսրայելի դեմ ուղղված կողմնակալության պատճառով։ Սա տեղի է ունենում կառույց  վերադառնալուց ընդամենը երկու տարի անց, գրում է France 24-ը։

«Նախագահ Թրամփը որոշել է դուրս բերել Միացյալ Նահանգները ՅՈՒՆԵՍԿՕ-ից, որն աջակցում է պառակտող մշակութային և սոցիալական գաղափարներին, ինչը լիովին հակասում է այն առողջ բանականության քաղաքականությանը, որի օգտին ամերիկացիները քվեարկել են նոյեմբերին»,- New York Post-ին ասել է Սպիտակ տան փոխխոսնակ Աննա Քելլին։

ՅՈՒՆԵՍԿՕ-ն և Սպիտակ տունն անմիջապես չեն հաստատել այս տեղեկությունը։

Այս քայլը, որը տեղի կունենա 2026 թվականի դեկտեմբերի վերջին, հարված է Փարիզում գտնվող գործակալությանը, որը հիմնադրվել է Երկրորդ համաշխարհային պատերազմից հետո՝ կրթության, գիտության և մշակույթի ոլորտում միջազգային համագործակցության միջոցով խաղաղությունը խթանելու համար։

Նախագահ Դոնալդ Թրամփն իր պաշտոնավարման առաջին ժամկետի ընթացքում ԱՄՆ-ն արդեն դուրս էր բերել ՅՈՒՆԵՍԿՕ-ից, ինչպես նաև Առողջապահության համաշխարհային կազմակերպությունից, ՄԱԿ-ի Մարդու իրավունքների խորհրդից, Կլիմայի փոփոխության մասին գլոբալ համաձայնագրից և 2015 թվականի Իրանի միջուկային համաձայնագրից։

Նախկին նախագահ Ջո Բայդենը չեղյալ էր հայտարարել այս որոշումները 2021 թվականին պաշտոնը ստանձնելուց հետո՝ ԱՄՆ-ն վերադարձնելով ՅՈՒՆԵՍԿՕ, ԱՀԿ և Կլիմայի մասին համաձայնագիր։

ԱՄՆ-ը միացել է ՅՈՒՆԵՍԿՕ-ին 1945 թվականին՝ դրա հիմնադրման պահից, սակայն առաջին անգամ դուրս է եկել 1984 թվականին՝ ի նշան ենթադրյալ ֆինանսական վատ կառավարման և ենթադրյալ հակաամերիկյան կողմնակալության դեմ բողոքի, և վերադարձել է գրեթե 20 տարի անց՝ 2003 թվականին՝ նախագահ Ջորջ Բուշ կրտսերի օրոք, որն այն ժամանակ ասել էր, որ գործակալությունը ձեռնարկել է անհրաժեշտ բարեփոխումներ։

Միացյալ Նահանգները տրամադրում է ՅՈՒՆԵՍԿՕ-ի ընդհանուր բյուջեի մոտ 8 տոկոսը։

Թարգմանությունը՝ Էմմա Չոբանյանի