16.07.2026 | 18:35
Վահագն Խաչատուրյանն ընդունել է Հայաստանում Ղազախստանի դեսպան Բոլատ Իմանբաևին
Ողջունում ենք խաղաղության համաձայնագիրը, հուսով ենք՝ շուտով կստորագրվի․Վրաստանի ԱԳ նախարար
Քաղաքականություն
22.07.2025 | 15:51
«Մենք քննարկել ենք տարածաշրջանում կայունության կարևորությունը, Վրաստանը ուշադիր հետևում է Ադրբեջանի և Հայաստանի միջև ընթացող երկխոսությանը։ Մենք ողջունում ենք խաղաղության համաձայնագիրը, որը, հուսով ենք՝ առաջիկայում կստորագրվի»,- այս մասին հայտարարել է Վրաստանի արտաքին գործերի նախարար Մակա Բոճորիշվիլին Ադրբեջանի արտաքին գործերի նախարար Ջեյհուն Բայրամովի հետ Թբիլիսիում ճեպազրույցի ժամանակ, փոխանցում է վրացական Առաջին ալիքը։
Մակա Բոճորիշվիլիի խոսքով՝ Վրաստանը անկեղծորեն հետաքրքրված է տարածաշրջանում խաղաղության և կայունության ամրապնդմամբ։
«Մենք միշտ ասել ենք և կկրկնենք, Վրաստանն անկեղծորեն հետաքրքրված է մեր տարածաշրջանում խաղաղության և կայունության ամրապնդմամբ։ Մենք ուրախ ենք, որ ապրիլի 17-ին հնարավորություն ունեցանք հյուրընկալելու եռակողմ հանդիպում։ Սա այս ձևաչափով առաջին հանդիպումն էր, երբ երեք երկրների փոխնախարարները հավաքվել էին Թբիլիսիում և քննարկել տարածաշրջանային նշանակության հարցեր։ Մենք կարծում ենք, որ ունենք ներուժ՝ շարունակելու երեք երկրների միջև համագործակցությունն այս ձևաչափով»,-ասել է նա՝ նշելով, որ տարածաշրջանում տեղի ունեցող գործընթացները, անշուշտ, շատ կարևոր են, և այդ համատեքստում կարևոր են երկրների միջև համագործակցությունն ու գործընկերությունը։
Ըստ Վրաստանի ԱԳ նախարարի՝ ներկայիս աշխարհաքաղաքական իրավիճակը կարելի է դիտարկել որպես յուրատեսակ հնարավորություն՝ Վրաստանի և Ադրբեջանի շահերը պաշտպանելու, նրանց շահերը հաշվի առնելու, տարածաշրջանի մյուս երկրների հետ լայն համագործակցություն զարգացնելու և այս իրավիճակում երկրների ունեցած ներուժն ավելի լիարժեք օգտագործելու առումով։
Թարգմանությունը՝ Էմմա Չոբանյանի
