13.01.2026 | 18:59
Համոզված եմ, որ այլևս պատերազմ չի լինի. Ալիև
Բրիտանիան պատժամիջոցներ է սահմանել ՌԴ «ստվերային նավատորմի» 135 տանկերի նկատմամբ
Քաղաքականություն
22.07.2025 | 12:56
Մեծ Բրիտանիան պատժամիջոցներ է սահմանել 135 տանկերի նկատմամբ, որոնք, ըստ Լոնդոնի, պատկանում են Ռուսաստանի Դաշնության, այսպես կոչված, «ստվերային նավատորմին», որն օգտագործվում է Մոսկվայի կողմից արևմտյան պատժամիջոցները շրջանցելու համար: 2024 թվականի սկզբից ի վեր այս նավերն անօրինական կերպով տեղափոխել են 24 միլիարդ դոլար արժողությամբ բեռներ, ասվում է Մեծ Բրիտանիայի կառավարության կայքում մամուլի հաղորդագրության մեջ, գրում է DW-ի ռուսական ծառայությունը։
«Նոր պատժամիջոցները մեծացնում են Ռուսաստանի կենսականորեն կարևոր նավթարդյունաբերության ոլորտի վրա ճնշումը և հարված են հասցնում Պուտինի մաշված ստվերային նավատորմի գործունեությանը»,- նշվում է փաստաթղթում:
Լոնդոնն ընդգծում է, որ սահմանափակումները նախատեսված են նավթային եկամուտների հոսքը կրճատելու համար, որոնք Ռուսաստանն օգտագործում է Ուկրաինայում պատերազմ վարելու համար:
Պատժամիջոցներն ազդել են նաև Intershipping Services LLC-ի վրա, որը, ըստ Մեծ Բրիտանիայի, ռուսական «ստվերային նավատորմի» նավերը գրանցել է Գաբոնի դրոշի ներքո: Ամեն տարի դրանք ռուսական պետության անունից տեղափոխել են մինչև 10 միլիարդ դոլարի ապրանք:
Մեկ այլ ձեռնարկություն, որը հայտնվել է սահմանափակումների տակ, Litasco Middle East DMCC-ն է: Ըստ բրիտանական իշխանությունների՝ այս ընկերությունը կապված է ռուսական Lukoil կոնցեռնի հետ և զբաղվում է ռուսական նավթի մեծ ծավալների փոխադրմամբ:
«Մինչ Պուտինը շարունակում է ձգձգել և հետաձգել լուրջ խաղաղ բանակցությունները, մենք չենք մնա անտարբեր։ Մենք կշարունակենք օգտագործել մեր պատժամիջոցների ռեժիմի ամբողջ ուժը՝ յուրաքանչյուր փուլում տնտեսական ճնշումը մեծացնելու և Ուկրաինայի կողքին ուս ուսի կանգնելու համար»,- ասել է Մեծ Բրիտանիայի արտաքին գործերի նախարար Դեյվիդ Լամմին։
Ըստ Լոնդոնի տվյալների՝ Արևմուտքի պատժամիջոցները հանգեցրել են նրան, որ Ռուսաստանի նավթի և գազի եկամուտներն ավելի քան մեկ երրորդով կրճատվել են երեք տարվա ընթացքում։ Հուլիսի 18-ին Մեծ Բրիտանիայի կառավարությունը հայտարարել էր, որ ԵՄ-ի հետ միասին կնվազեցնի ռուսական նավթի գնի շեմը 60 դոլարից մինչև 47.6 դոլար՝ մեկ բարելի համար։
Թարգմանությունը՝ Էմմա Չոբանյանի
