«Զանգեզուրի միջանցքը» չի կարող իրականացվել առանց Թեհրանի ռազմավարական շահերն ու դերը հաշվի առնելու. Իրանի խորհրդարանի պատգամավոր

«Զանգեզուրի միջանցքը» չի կարող իրականացվել առանց Իրանի ռազմավարական շահերն ու դերը հաշվի առնելու։ Այս մասին հայտարարել է Իրանի խորհրդարանի Արդեբիլի պատգամավոր, Իրան-Ադրբեջան խորհրդարանական բարեկամության խմբի ղեկավար Սեդիֆ Բադրին։

«Վերջին օրերին մենք ականատես ենք եղել «Զանգեզուրի միջանցքի» իրականացման վերաբերյալ որոշ ոչ պրոֆեսիոնալ և ոչ գործնական մեկնաբանությունների, ոչ մի կերպ այս հարցերի առաջարկը չի ստանա գործադիր և գործնական տեսք, և անհրաժեշտ է, որ մեր տարածաշրջանային շահերը հաշվի առնվեն այս նախագծերի իրականացման ժամանակ։ Սպառնալիքների և հարկադրանքի լեզուն երբեք տարածաշրջանային զարգացման ճիշտ և տրամաբանական ուղին չէ, և Կովկասյան տարածաշրջանի բոլոր երկրները պետք է ձգտեն ապահովել ընդհանուր շահերը՝ Իրանի Իսլամական Հանրապետության աջակցությամբ և կենտրոնական դերակատարմամբ»,- ասել է նա։

Իրանցի պատգամավորը հավելել է՝ «Կովկաս տանող կայուն և անվտանգ ուղին անցնում է միայն Իրանի գլխավոր առանցքով, և տարածաշրջանի բոլոր երկրները գիտեն, որ Իրանից բացի՝ ոչ մի այլ երկիր չի կարող ապահովել իրենց շահերը տարածաշրջանում»։

«Մենք չենք ձգտում այս ոլորտում երկրորդական հարցեր բարձրացնել, բայց կարծում ենք, որ Կովկասում ոչ մի տարանցիկ ուղի, այդ թվում՝ «Զանգեզուրի միջանցքը», կենսունակ և կայուն չի լինի առանց Իրանի լուրջ և զգայուն շահերի ապահովման»,- հայտարարել է պատգամավորը։

Հիշեցնենք, որ Իրանի ԱԳՆ մամուլի խոսնակ Էսմայիլ Բաղային արձագանքել է Ադրբեջանի նախագահ Իլհամ Ալիևի, այսպես կոչված, «Զանգեզուրի միջանցքի» մասին արված հայտարարություններին՝ նշելով, որ անցուղիների ստեղծումը չպետք է խաթարի երկրների տարածքային ամբողջականությունը։

Թարգմանությունը՝ Էմմա Չոբանյանի