Ուկրաինայի ՆԳՆ բարձրաստիճան ոստիկանին մահացած են գտել Իսպանիայում

Իսպանիայի Վիլյախոյոսա քաղաքի Cala Alta բնակելի համալիրի լողավազանում մահացած են գտել Ուկրաինայի ՆԳՆ կազմակերպված հանցավորության դեմ պայքարի վարչության նախկին աշխատակից Իգոր Գրուշևսկիին։ Այս մասին հաղորդում է El Español-ը՝ հղում անելով աղբյուրներին, փոխանցում է Current time-ը։

Դեպքը տեղի է ունեցել հունիսի 29-ին։ Լրատվամիջոցի տեղեկությունների համաձայն՝ տղամարդու մարմինը դեմքով դեպի ներքև ընկած է եղել ջրի մեջ և հայտնաբերվել է հարևանների կողմից։ Նրա մարմնի վրա բռնության ակնհայտ հետքեր չեն եղել, բայց ականջից արյուն է հոսել։ Բնակելի համալիրի բնակիչները կարծում են՝ քիչ հավանական է, որ տղամարդը կարող էր խեղդվել, քանի որ լողավազանի խորությունը չի գերազանցում 1,50 մետրը։

Գրուշևսկին մի քանի ամիս առաջ է գնել բնակարանը և վերանորոգում էր այն։ Լրագրողները հարցազրույց են վերցրել մոտ 20 հարևաններից, որոնցից միայն մեկն է իմացել նրա անունը, և որ աշխատել է Ներքին գործերի նախարարության կազմակերպված հանցագործության դեմ պայքարի վարչությունում։

Նույն բնակելի համալիրում 2024 թվականի փետրվարին սպանվել էր ռուս օդաչու Մաքսիմ Կուզմինովը, որն ուղղաթիռ էր թռցրել Ուկրաինա: El País պարբերականը գրել էր, որ իսպանական հետախուզական գործակալությունները չեն կասկածում Ռուսաստանի մասնակցությանն օդաչուի սպանությանը, բայց խոստովանում են, որ քննության համար դժվար կլինի գտնել ուղղակի ապացույցներ, քանի որ, ամենայն հավանականությամբ, հանցագործությունը կատարել են վարձու մարդասպանները:

Ուկրաինայի արտաքին գործերի նախարարությունը, հղում անելով Բարսելոնայում երկրի գլխավոր հյուպատոսությանը, հայտարարել է, որ Գրուշևսկու մահը խեղդվելու հետևանք է։

«Հյուպատոսներն օգնություն են ցուցաբերել մարմինն Ուկրաինա հայրենադարձելու համար համապատասխան փաստաթղթերի պատրաստման գործում»,- լրագրողներին հայտնել են արտաքին քաղաքականության գերատեսչության մամուլի ծառայությունից։

Թարգմանությունը՝ Էմմա Չոբանյանի