ՌԴ-ի հետ լարվածության ֆոնին Ադրբեջանը հրաժարվել է մասնակցել Մոսկվայում կայանալիք ԱՊՀ տնտեսական խորհրդի նիստին

Ադրբեջանը հրաժարվել է մասնակցել Մոսկվայում կայանալիք ԱՊՀ տնտեսական խորհրդի նիստին։ Այս մասին հայտնում է ադրբեջանական իշխանամերձ Trend գործակալությունը։ Ադրբեջանը սովորաբար ԱՊՀ նիստերին ներկայացնում էր առաջին փոխվարչապետ Յագուբ Էյուբովը։

«Յագուբ Էյուբովը ներկա չի լինի այդ միջոցառմանը։ Նման որոշման պատճառը Եկատերինբուրգում տեղի ունեցած վերջին իրադարձություններն են, անցյալ տարվա վերջին ռուսների կողմից խոցված AZAL-ի օդանավը և ռուսական կողմի անպատրաստակամությունը՝ այդ խնդիրները լուծելու համար համարժեք քայլեր ձեռնարկելու հարցում», – ասել է գործակալության աղբյուրը։

Ադրբեջանի և Ռուսաստանի հարաբերությունները սրվել են այն բանից հետո, երբ հունիսի 27-ին Եկատերինբուրգում ձերբակալվեց ադրբեջանական ծագում ունեցող ավելի քան 50 անձ։ Ձերբակալության ընթացքում մահացել է երկու մարդ՝ Ադրբեջանի 60-ամյա քաղաքացի Հուսեյն Սաֆարովը և նրա եղբայրը՝ 55-ամյա Զիյադդինը։ Բաքուն պահանջում է պատասխանատվության ենթարկել մեղավորներին։ Ադրբեջանի Գլխավոր դատախազությունը քրեական գործ է հարուցել Ռուսաստանի անվտանգության ուժերի կողմից իր քաղաքացիների խոշտանգումների և սպանության փաստով։

Հիշեցնենք, որ 2024 թվականի դեկտեմբերի 25-ի երեկոյան էլ Ղազախստանի Ակտաու քաղաքի մոտակայքում վթարի էր ենթարկվել  ադրբեջանական AZAL-ի J2-8243 չվերթը կատարող Embraer 190AR ուղևորատար օդանավը։ Դրանում եղել էր 67 մարդ՝ 62 ուղևոր և անձնակազմի 5 անդամ։ Վթարի հետևանքով զոհվել էր 38 մարդ։ Որպես աղետի պատճառ նշվում է հակաօդային հրթիռային հարվածը, որը, ենթադրաբար, եղել է ռուսական «Պանցիր-Ս1» հակաօդային համակարգից:  Բաքուն պահանջում է, որ   Ռուսաստանը անցկացնի «Ադրբեջանական ավիաուղիներ» ընկերությանը պատկանող օդանավի  հետ կապված ողբերգության լիարժեք և թափանցիկ հետաքննություն, բացահայտի և կպատժի մեղավորներին, ինչպես նաև փոխհատուցում վճարի տուժածներին։

Թարգմանությունը՝ Էմմա Չոբանյանի