Պուտինը հանձնարարել է չեղարկել ԵՏՄ երկրներից խախտմամբ տրված ապրանքների վկայականները

ՌԴ նախագահ Վլադիմիր Պուտինը հանձնարարել է կառավարությանը փոփոխություններ կատարել օրենսդրության մեջ և մշակել Եվրասիական տնտեսական միության (ԵՏՄ) երկրներում խախտումներով տրված ապրանքների վկայականները չեղյալ համարելու մեխանիզմ։ Այս մասին հայտնել է Կրեմլի մամուլի ծառայությունը, փոխանցում է ՌԲԿ-ն։

Հանձնարարականների համաձայն՝ անհրաժեշտ է, մի կողմից, ունենալ նման ապրանքների դադարեցման կամ անվավեր ճանաչելու, դրանց շրջանառությունը կասեցնելու և շուկայից հետ կանչելու հնարավորություն։ Մյուս կողմից, նշել է ՌԴ նախագահը, անհրաժեշտ է բարձրացնել տեխնիկական կանոնակարգերի պարտադիր պահանջների պահպանման մոնիթորինգի մեխանիզմների արդյունավետությունը։

Պատասխանատու է նշանակվել ՌԴ վարչապետ Միխայիլ Միշուստինը։ Նա պետք է հաշվետվություն ներկայացնի կատարված աշխատանքի վերաբերյալ մինչև 2025 թվականի դեկտեմբերի 30-ը։

Հունիսի վերջին Պուտինը հայտարարել էր, որ միության տնտեսությունների աճի տեմպը գերազանցում է համաշխարհային միջին ցուցանիշը։

2024 թ-ի վերջին «Ռոսակրեդիտացիայի» ղեկավարի տեղակալ Մաքսիմ Զալազաևը հայտարարել էր, որ ծառայությունը ամենօրյա մոնիթորինգ է անցկացնում ԵՏՄ 27 տեխնիկական կանոնակարգերի համաձայն հավաստագրման պահանջների պահպանման նկատմամբ՝ կենտրոնանալով սոցիալապես նշանակալի ոլորտների վրա։

Բոլոր նոր հավաստագրերը ստուգվում են ամեն օր։ Հավաստագրի կասեցումը տեղի է ունենում տրամադրման օրվանից 24 ժամվա ընթացքում։

Նրա խոսքով՝ վերջին երկու տարվա ընթացքում «Ռոսակրեդիտացիան» տվյալների փոխանակման ծառայության շրջանակներում  անցկացրել է ավելի քան 1,1 միլիոն փաստաթղթային ստուգում։ Ապրանքների հիմնական կատեգորիաները, որոնց վերաբերյալ ստացվում են վկայականների և հայտարարագրերի իսկության վերաբերյալ հարցումներ, կենցաղային ապրանքներն են (47%), սննդամթերքը (18%), ցածր լարման սարքավորումները (17%), խաղալիքները և երեխաների համար նախատեսված ապրանքները (9%)։

Թարգմանությունը՝ Էմմա Չոբանյանի