Թրամփը հայտարարել է, որ Coca-Cola-ն իր խնդրանքով փոխել է գազավորված ըմպելիքի բաղադրությունը

ԱՄՆ նախագահ Դոնալդ Թրամփը հայտարարել է, որ Coca-Cola-ն իր խնդրանքով համաձայնել է փոխել ԱՄՆ-ում վաճառվող գազավորված ըմպելիքի բաղադրատոմսը, փոխանցում է Meduza-ն։

«Ես քննարկել եմ Coca-Cola-ի հետ Միացյալ Նահանգների Coca-Cola-ում ԻՐԱԿԱՆ շաքարեղեգի շաքար օգտագործելու հնարավորությունը, և նրանք համաձայնել են դա անել։ Ես կցանկանայի շնորհակալություն հայտնել Coca-Cola-ի բոլոր ղեկավարներին։ Սա շատ լավ քայլ կլինի նրանց կողմից, կտեսնեք։ Այդպես ավելի լավ կլինի»,- գրել է Թրամփը Truth Social սոցիալական ցանցում։

Coca-Cola-ն չորեքշաբթի իր կայքում հայտարարություն է հրապարակել, որում ասվում է, որ ընկերությունը հիանում է նախագահ Թրամփի «խանդավառությամբ մեր պաշտամունքային Coca-Cola ապրանքանիշի նկատմամբ»։

«Coca-Cola ապրանքատեսականու նոր ինովացիոն առաջարկների մասին ավելի շատ մանրամասներ կհրապարակվեն առաջիկայում»,- ասվում է հայտարարության մեջ։

Ներկայում Coca-Cola-ն ամերիկյան շուկա է մատակարարում համանուն գազավորված ըմպելիք, որտեղ շաքարեղեգի փոխարեն օգտագործվում է բարձր ֆրուկտոզային եգիպտացորենի օշարակ: Reuters-ը նշում է, որ առողջապահության նախարար Ռոբերտ Ֆ. Քենեդին սննդամթերքում արհեստական գունանյութերից և այլ հավելումներից հրաժարվելու արշավ է սկսել։ Քենեդի կրտսերը նաև քննադատել է ամերիկացիների կողմից շաքարի բարձր սպառումը:

Ինքը՝ Թրամփը, նախընտրում է «դիետիկ կոկա-կոլա», որում  օգտագործվում են  շաքարի փոխարինիչներ: Թրամփի՝ Սպիտակ տուն տեղափոխվելու առաջին ժամկետի ընթացքում հաղորդվում էր, որ Օվալաձև աշխատասենյակում տեղադրվել է այդ ըմպելիքը պատվիրելու հատուկ կոճակ:

Թարգմանությունը՝ Էմմա Չոբանյանի