«Ինձ չեն պատժում, դժբախտացնում են». կալանավորը ինքն է բանտից փորձում տուժողներին նիստի կանչել․ ՏԵՍԱՆՅՈՒԹ

Արդեն չորս տարի չորս ամիս կալանքի տակ գտնվող 48-ամյա Վրեժ Տեր-Գալստանյանը հույսը կտրել է իր գործի հետ կապված դատարանի քայլերի արդյունավետությունից։  Կալանավայրից ինքն է սկսել գործով անցնող վկաներին և տուժողներին դատարան հրավիրել։

Տեր-Գալստանյանին խարդախության և յուրացման հոդվածների հատկանիշներով մի քանի դրվագ պարունակող մեղադրանք է առաջադրված։ Նա կալանավորվել է դեռևս 2019 թվականին։ Հետագայում խափանման միջոց է ընտրվել գրավը, սակայն Դատախազության կողմից այն բողոքարկվել է, և 5 երեխաների հայրը կրկին կալանավորվել է։ 2 տարվա նախաքննությունից հետո գործն ուղարկվել է դատարան, նախ՝ Վաչե Մարգարյանի, իսկ 2023 թվականի նոյեմբերից՝ Կարեն Ֆարխոյանի մոտ։ 

Եվ այս գործընթացում խախտվում են կալանավորի իրավունքները․ Տեր-Գալստանյանը նշում է՝ քանի որ ինքն է վկաներին գտնում ու խնդրում դատարան ներկայանալ, այս հանգամանքը բացասական երանգով շեշտվում է դատախազի կողմից խափանման միջոցի քննության ժամանակ։

Կալանքի տակ մնալը և դատական գործի նմանօրինակ ձգձգումն ազդում է ոչ միայն կալանավորի, այլև նրա բազմանդամ ընտանիքի վրա։

Կալանավորին վրդովեցրել է նաև հանրային մեղադրողի վարքագիծը դատարանում․ Տեր-Գալստանյանի խոսքով՝ ամիսներ առաջ դատական նիստից հետո Երևան քաղաքի դատախազ Հայկ Ավետյանը դատավորի և մյուսների ներկայությամբ սուլելով է լքել դատարանի դահլիճը։ Ըստ նրա՝ այս վարքագծի մասին դիմում է ներկայացրել գլխավոր դատախազին, սակայն պատասխան է ստացել, որ Ավետյանը նման արարք չի կատարել, ուստի ծառայողական քննություն սկսելու կարիք չկա։ Factor TV-ն ևս հարցում էր ուղարկել գերատեսչություն, որտեղից հերքեցին դատախազի՝ սուլելու մասին տեղեկությունը։

Վրեժ Տեր-Գալստանյանն ունի նաև առողջական խնդիրներ, որոնք, նրա խոսքով, հենց հիմնարկում է ձեռք բերել։ Ասում է՝ հոգնել է ամեն անգամ դատարան գնալ-գալուց և որևէ արդյունքի չհասնելուց։

Կալանավորի գործով հաջորդ նիստը նշանակվել է հոկտեմբերին։ Հայտնի չէ՝ արդյո՞ք վկաները և տուժողները դատարան կներկայանան և գործն առաջ կշարժվի, թե՞ կրկին կքննարկվի Տեր-Գալստանյանի խափանման միջոցի հարցը և կորոշվի նույնը՝ կալանավորը դեռևս պետք է շարունակի մնալ բանտում։

Մանրամասները՝ տեսանյութում։

Ռոզա Վարդանյան