Եկատերինբուրգում ձերբակալվել է ադրբեջանական սփյուռքի ղեկավարի որդին

Եկատերինբուրգում ձերբակալվել է Ուրալի ադրբեջանական սփյուռքի ղեկավար Շահին Շիխլինսկիի որդին՝ Մուտվալի Շիխլինսկին։ Այս մասին հայտնում են ադրբեջանական լրատվամիջոցները։

Նշվում է, որ հուլիսի 1-ին հոր՝ Շահին Շիխլինսկիի ձերբակալության ժամանակ նա մեքենայով վրաերթի է ենթարկել հատուկ նշանակության ուժերի աշխատակիցներից մեկին։ Շահին Շիխլինսկին վկա է 2001 և 2011 թվականներին կատարված սպանությունների և սպանության փորձերի հետ կապված քրեական գործով, նա այժմ թաքնվում է։

Ադրբեջանական ԶԼՄ-ները, ռուսական աղբյուրներին վկայակոչելով, նշում են, որ Մուտվալի Շիխլինսկին ձերբակալվել է Ռուսաստանի Դաշնության քրեական դատավարության օրենսգրքի 91-րդ հոդվածի համաձայն, որը թույլ է տալիս կասկածյալին 48 ժամ կալանքի տակ պահել։ Աղբյուրի փոխանցմամբ՝ խուզարկություններ են անցկացվելու նրա տանը։

Նշվում է, որ Մոսկվայում էլ Շահին Շիխլինսկիի դեմ գործ է հարուցվել, սակայն չի հաղորդվում, թե որ հոդվածով։

Ադրբեջանի և Ռուսաստանի հարաբերությունները սրվել են այն բանից հետո, երբ հունիսի 27-ին Եկատերինբուրգում ձերբակալվել է ադրբեջանական ծագում ունեցող ավելի քան 50 անձ։ Ձերբակալության ընթացքում մահացել է առնվազն երկու մարդ՝ Ադրբեջանի 60-ամյա քաղաքացի Հուսեյն Սաֆարովը և նրա եղբայրը՝ 55-ամյա Զիյադդինը։ Բաքուն պահանջում է պատասխանատվության ենթարկել մեղավորներին։ Ադրբեջանի Գլխավոր դատախազությունը քրեական գործ է հարուցել Ռուսաստանի անվտանգության ուժերի կողմից իր քաղաքացիների խոշտանգումների և սպանության փաստով։

Օրերս էլ,  ի դեպ, Մոսկվայի մարզի ադրբեջանական սփյուռքի ղեկավար Էլշան Իբրահիմովն արտաքսվել էր Ռուսաստանից։ Ավելի վաղ նրան զրկել էին ՌԴ քաղաքացիությունից։

Թարգմանությունը՝ Էմմա Չոբանյանի