Քաղաքականություն
15.07.2025 | 15:37
ԵՄ արտաքին գործերի և անվտանգության քաղաքականության հարցերի բարձր ներկայացուցիչ Կայա Կալլասը հաստատել է, որ քննարկվում է Վրաստանի հետ առանց վիզայի ռեժիմի դադարեցման հնարավորությունը քննարկվում է՝ երկրի ժողովրդավարական զարգացման «լուրջ հետընթացի» պատճառով, փոխանցում է Эхо Кавказа-ն։
«Մենք լուրջ հետընթաց ենք տեսնում Վրաստանում, և մենք կքննարկենք, թե ինչ այլ բան կարելի է անել։ Բոլոր տարբերակները սեղանին են, այդ թվում՝ առանց վիզայի ռեժիմի դադարեցումը և այլ միջոցառումներ, որոնք կարող են փոխել Վրաստանի կառավարության հաշվարկները»,- Բրյուսելում ԵՄ խորհրդի նիստից առաջ ասել է Կալլասը։
Նրա խոսքով՝ ԵՄ-ն պատրաստել է միջոցառումների ցանկ՝ ի պատասխան ցուցարարների, այդ թվում՝ երիտասարդների նկատմամբ կայացված «անհամաչափ դատավճիռների»։ Կալլասը շեշտել է, որ սա վկայում է դատական համակարգի խնդիրների մասին, որը, ըստ նրա, ռեպրեսիվ ապարատի մաս է կազմում։
Նա նաև հաստատել է, որ նոր պատժամիջոցների փաթեթում ներառված են վրացի երկու դատավորների անուններ։ Կալլասի խոսքով՝ ԵՄ-ում նախկինում էլ են եղել տարաձայնություններ պատժամիջոցների վերաբերյալ, բայց քննարկումները կշարունակվեն։
Հիշեցնենք, որ Հունգարիան և Սլովակիան դեմ են արտահայտվել Վրաստանի դեմ պատժամիջոցներին։
«Այսօր Վրաստանին նամակ կուղարկվի առանց վիզայի ռեժիմի վերաբերյալ։ Վրաստանն ուներ որոշակի պայմաններ, որոնք պետք է կատարեր։ Եթե այդ պայմանները չկատարվեն նշված ժամկետում, մենք ստիպված կլինենք դադարեցնել առանց վիզայի ռեժիմը»,- հավելել է Կալլասը՝ չնշելով նամակում նշված ժամկետը։
«Ազատություն» ռադիոկայանի փոխանցմամբ՝ դա այս տարվա հոկտեմբերն է։
Ավելի վաղ Վրաստանի իշխող «Վրացական երազանք» կուսակցությունը հայտարարել էր, որ առանց վիզա ռեժիմի հնարավոր դադարեցման մասին խոսակցությունները «շանտաժ» և «սպառնալիք» են։
Թարգմանությունը՝ Էմմա Չոբանյանի
