07.08.2026 | 23:37
Անձրև, ամպրոպ և ջերմաստիճանի նվազում. առաջիկա օրերի եղանակի կանխատեսումը
Վորոնեժն ԱԹՍ-ների հարձակման է ենթարկվել․ հաղորդվում է 16 վիրավորի մասին․ ՏԵՍԱՆՅՈՒԹ
Քաղաքականություն
15.07.2025 | 12:36
Ուկրաինական անօդաչու թռչող սարքերը հարձակվել են ՌԴ Վորոնեժի վրա։ ԱԹՍ-ի բեկերներն ընկել են քաղաքի կենտրոնում, հայտնել է մարզի նահանգապետ Ալեքսանդր Գուսևը, գրում է Meduza-ն։
Ըստ նրա՝ մի քանի մարդ թեթև վնասվածքներ է ստացել։ Բացի այդ, մարզի շրջաններից մեկում մի կին հոսպիտալացվել է ուսի վնասվածքով։ Հարձակման հետևանքով վնասվել են բազմահարկ բնակելի շենքերի մի քանի բնակարաններ, ինչպես նաև Վորոնեժի արվարձաններում և Վորոնեժի մարզի շրջաններից մեկում գտնվող մասնավոր տներ։
Ավելի ուշ Գուսևը թարմացված տվյալներ է ներկայացրել․ ԱԹՍ-ների հարձակման հետևանքով վիրավորվել է 16 մարդ։ Նրանցից 15-ը վիրավորվել են Վորոնեժի Կենտրոնական և Կոմինտերնովսկի շրջաններում։ Տուժածներից երկուսը ծանր վիճակում են․ մեկը կոմայի մեջ է, մյուսի թոքերն են վնասվել։ Վորոնեժում, ընդհանուր առմամբ, 13 մարդ է հոսպիտալացվել։
Ուկրաինական անօդաչու թռչող սարքերը հարձակվել են նաև Լիպեցկի մարզի վրա: Նահանգապետ Իգոր Արտամոնովի խոսքով՝ Ելեցում անօդաչու թռչող սարքն ընկել է արդյունաբերական գոտու տարածքում, մեկ մարդ վիրավորվել է: Դոբրինսկի շրջանում անօդաչու թռչող սարք է ընկել մասնավոր բնակելի տան մոտ, տուժածներ չկան։
Ռուսաստանի Պաշտպանության նախարարությունը հայտնել է, որ գիշերը որսացել և ոչնչացրել է ուկրաինական 55 անօդաչու թռչող սարք․ 32-ը՝ Բելգորոդի մարզի վրա, 12-ը՝ Վորոնեժի, երեքը՝ Լիպեցկի, մեկական՝ Ռոստովի և Կուրսկի մարզերի, ևս վեցը՝ Սև ծովի վրա։
Բելգորոդի և Կուրսկի ղեկավարները հարձակումների մասին չեն հայտնել։ Ռոստովի մարզում, ըստ նահանգապետի պաշտոնակատար Յուրի Սլյուսարի, տուժածներ չկան։
Թարգմանությունը՝ Էմմա Չոբանյանի
