06.10.2026 | 10:42
Հրանտ-Լեոն Ռանոսն առաջին գոլն է խփել Իսպանիայի Սեգունդայում. ՏԵՍԱՆՅՈՒԹ
Մոսկվայի դատարանը գրող Բորիս Ակունինին հեռակա դատապարտել է 14 տարվա ազատազրկման
Քաղաքականություն
14.07.2025 | 20:47
Մոսկվայի 2-րդ Արևմտյան շրջանի ռազմական դատարանը գրող Բորիս Ակունինին (իսկական անունը՝ Գրիգորի Չխարտիշվիլի) հեռակա կարգով դատապարտել է 14 տարվա ազատազրկման խիստ ռեժիմի ուղղիչ գաղութում, հաղորդում է Mediazona-ն, որին վկայակոչում է Meduza-ն։
Գրողը մեղավոր է ճանաչվել Քրեական օրենսգրքի երեք հոդվածով՝ ահաբեկչական գործունեությանը նպաստելու (Քրեական օրենսգրքի 205.1 հոդվածի 1-ին մաս), ահաբեկչության արդարացման (205.2 հոդվածի 2-րդ մաս) և «օտարերկրյա գործակալի» պարտականություններից խուսափելու (330.1 հոդվածի 2-րդ մաս):
Դատարանը նաև տուգանել է Ակունինին 400,000 ռուբլով և արգելել նրան չորս տարի ժամկետով կառավարել ինտերնետային էջեր՝ պատիժը կրելուց հետո:
Մեղադրական կողմի վարկածով՝ 2025 թվականի հունվարից մինչև ապրիլ Ակունինն իր տելեգրամի ալիքում հրապարակել է «առնվազն 33 նյութ»՝ առանց նշելու, որ դրանք կապված են «օտարերկրյա գործակալի» գործունեության հետ։ Մեղադրական կողմը գրողի գրառումներից մեկը՝ 2024 թվականի փետրվարի 18-ի հրապարակումը, համարել է «ահաբեկչության արդարացում»։ Ռուսաստանի իշխանություններն Ակունինի զրույցը պրանկերներ Վովանի և Լեքսուսի հետ, որոնք ներկայացել էին որպես Ուկրաինայի նախագահ Վլադիմիր Զելենսկի և մշակույթի նախարար Ալեքսանդր Տկաչենկո, համարել են «ահաբեկչական գործունեությանն օգնություն»։
Դատախազությունը պահանջել է Ակունինին դատապարտել 18 տարվա ազատազրկման։ Նշանակված փաստաբան Օլեգ Դուբինինը պահանջել է արդարացնել գրողին։ Դատարան է եկել մեղադրական կողմի միայն մեկ վկա՝ թոշակառու Նատալյա Կոպիլովան, որը Ակունինի հայտարարությունների մասին իմացել է Վլադիմիր Սոլովյովի հաղորդումներից։
Բանավեճի ընթացքում պետական ՏԱՍՍ գործակալությունը հրապարակել էր լուր, որ Ակունինը, իբր, չի ընդունել իր մեղքը «ահաբեկչությունը հրապարակայնորեն արդարացնելու» մեջ։ Գրողը, որը ներկա չէ դատական նիստին և գտնվում է Ռուսաստանից դուրս, մեղադրել է գործակալությանը ստելու մեջ։
«ՏԱՍՍ-ը, ինչպես հաճախ է պատահում նրանց հետ, ստում է։ Ես չեմ «ընդունում իմ մեղքը»։ Ես չեմ ճանաչում նրանց դատարանը։ Ես որևէ փաստաբանի լիազորություն չեմ տվել ներկայացնել ինձ նրանց, այսպես կոչված, դատարանում և ընդհանրապես ես ոչ մի կերպ չեմ մասնակցում այս ֆարսին»,- հայտարարել է Ակունինը սոցիալական ցանցերում։
2023 թվականի վերջին հայտնի էր դարձել, որ Ռուսաստանում Բորիս Ակունինի դեմ քրեական գործ է հարուցվել՝ կրեմլամետ պրանկերներ Վովանի և Լեքսուսի հետ զրույցից հետո։ АСТ հրատարակչությունը դադարեցրել էր Ակունինի գրքերի հրատարակումը, իսկ խոշոր ցանցերը՝ դրանք հանել վաճառքից: Ռոսֆինմոնիտորինգը գրողին ներառել է «ահաբեկիչների և ծայրահեղականների» ցուցակում: Ռուսաստանի արդարադատության նախարարությունը Ակունինին հայտարարել է «օտարերկրյա գործակալ»։
Թարգմանությունը՝ Էմմա Չոբանյանի
