Զելենսկին Յուլիա Սվիրիդենկոյին առաջարկել է գլխավորել Ուկրաինայի կառավարությունը 

Ուկրաինայի նախագահ Վլադիմիր Զելենսկին առաջին փոխվարչապետ, էկոնոմիկայի նախարար Յուլիա Սվիրիդենկոյին առաջարկել է գլխավորել կառավարությունը։

«Մենք սկսում ենք Ուկրաինայի գործադիր իշխանության վերափոխումը։ Ես հրավիրել եմ Յուլիա Սվիրիդենկոյին՝ գլխավորել Ուկրաինայի կառավարությունը և զգալիորեն թարմացնել նրա աշխատանքը։ Ակնկալում եմ, որ նոր կառավարության գործողությունների ծրագիրը կներկայացվի մոտ ապագայում»,- գրել է Զելենսկին սոցիալական ցանցերում։

Նա նշել է, որ հանդիպմանը զեկույց է ներկայացվել Ուկրաինայի վերականգնմանը նվիրված վերջերս կայացած համաժողովի շրջանակում եվրոպական և ամերիկյան գործընկերների հետ ձեռք բերված՝ Ուկրաինային աջակցության վերաբերյալ պայմանավորվածությունների կատարման վերաբերյալ։ Ըստ Զելենսկիի՝ պետք է հնարավորինս շուտ իրականացնեն այն ամենը, ինչը կարող է աջակցել պետության և հասարակության կայունությանը։

«Մենք նաև քննարկեցինք կոնկրետ միջոցառումներ, որոնք կամրապնդեն Ուկրաինայի տնտեսական ներուժը, կընդլայնեն ուկրաինացիներին աջակցելու ծրագրերը և մեր սեփական զենքի արտադրությունը»,- ընդգծել է նա։

Սվիրիդենկոյի՝ Ուկրաինայի կառավարության ղեկավարի պաշտոնում նշանակման մասին ավելի վաղ հայտարարել էին ուկրաինական լրատվամիջոցների աղբյուրները։ Հուլիսի 13-ին վարչապետ Դենիս Շմիգալի հետ հանդիպումից հետո Զելենսկին խոստացել էր «գործադիր իշխանության վերափոխում»։

2020 թվականի մարտից Ուկրաինայի վարչապետի պաշտոնը զբաղեցնում է Դենիս Շմիգալը։ Նրա հրաժարականի մասին չի հաղորդվել։ Ըստ ուկրաինական մի շարք լրատվամիջոցների աղբյուրների՝ Շմիգալը կզբաղեցնի Ուկրաինայի պաշտպանության նախարարի պաշտոնը։

Հիշեցնենք, որ FT-ն ավելի վաղ, իր աղբյուրներին վկայակոչելով, հայտնել էր, որ Ուկրաինայի կառավարությունում կադրային փոփոխություններ, ինչպես նաև ԱՄՆ-ում Ուկրաինայի դեսպանի փոխարինում է սպասվում։ Զելենսկին հաստատել է, որ նախատեսում է փոխարինել ԱՄՆ-ում Ուկրաինայի դեսպան Օքսանա Մարկարովային, որն այդ պաշտոնը զբաղեցնում է 2021 թվականից։ Դեսպանի պաշտոնը կարող է զբաղեցնել ներկայիս պաշտպանության նախարար Ռուստեմ Ումերովը։

Թարգմանությունը՝ Էմմա Չոբանյանի