07.09.2026 | 23:24
Հայկական պտուղ-բանջարեղենի արտահանումը ԱՄԷ․ Պապոյանը քննարկել է ծավալների ավելացումը
«Պուտինը լավ խոսում է, իսկ երեկոյան բոլորին ռմբակոծում»․ Թրամփը հաստատել է՝ ԱՄՆ-ն Ուկրաինային Patriot համակարգերի հրթիռներ կուղարկի
Քաղաքականություն
14.07.2025 | 10:54
ԱՄՆ նախագահ Դոնալդ Թրամփը հաստատել է, որ Վաշինգտոնը Կիևին Patriot հակաօդային պաշտպանության համակարգի հրթիռներ կուղարկի, գրում է Current time-ը։
«Մենք նրանց (Ուկրաինային) Patriot-ներ կուղարկենք, որոնց կարիքը նրանք շատ ունեն, քանի որ Պուտինը իսկապես շատերին է զարմացրել։ Նա լավ խոսում է, իսկ հետո երեկոյան բոլորին ռմբակոծում։ Այստեղ մի փոքր խնդիր կա, ինձ դա դուր չի գալիս»,- Reuters-ի փոխանցմամբ՝ ասել է Թրամփը։
Նա չի նշել, թե քանի հրթիռ է մտադիր ուղարկել Կիևին։
Axios-ը գրել էր, որ ԱՄՆ նախագահը խոստացել է Ուկրաինայի նախագահին անմիջապես ուղարկել Patriot-ի 10 հրթիռ։ Թրամփը նաև նշել է, որ ԵՄ-ն կփոխհատուցի զենքի մատակարարման ծախսերը։
«Մենք պատրաստվում ենք նրանց ուղարկելու ենք տարբեր տեսակի շատ բարդ ռազմական տեխնիկա։ Նրանք մեզ 100%-ով կվճարեն դրա համար»,- հայտարարել է ԱՄՆ նախագահը։
Միաժամանակ, ակնկալվում է, որ Թրամփը հուլիսի 14-ին կհայտարարի Ուկրաինային ռազմական օգնության նոր փաթեթի մասին: Axios-ի աղբյուրների փոխանցմամբ՝ այն, հավանաբար, կներառի Patriot զենիթահրթիռային հակաօդային համակարգեր և հեռահար հրթիռներ, որոնք կարող են հարվածել Ռուսաստանի խորքում գտնվող թիրախներին: Վերջնական որոշում դեռևս չի կայացվել:
«Թրամփը շատ զայրացած է Պուտինի վրա։ Նրա հայտարարությունը շատ ագրեսիվ կլինի»,- ասել է հանրապետական սենատոր Լինդսի Գրեմը։
Axios-ին հասանելի տեղեկատվության համաձայն՝ նոր պլանը կհայտարարվի Թրամփի և ՆԱՏՕ-ի գլխավոր քարտուղար Մարկ Ռյուտեի հանդիպման ժամանակ։
Միաժամանակ, Ուկրաինային ամերիկյան զենքի մատակարարումների համար կվճարեն եվրոպացի դաշնակիցները։ Նման մեխանիզմ հունիսին ՆԱՏՕ-ի գագաթնաժողովում առաջարկել է Ուկրաինայի նախագահ Վլադիմիր Զելենսկին։
Գերմանիայի կանցլեր Ֆրիդրիխ Մերցն էլ հուլիսի 10-ին Հռոմում կայացած համաժողովում հայտարարել էր, որ Բեռլինը մտադիր է ԱՄՆ-ից Patriot-ներ գնել՝ դրանք Կիևին փոխանցելու համար։
Թարգմանությունը՝ Էմմա Չոբանյանի
