09.10.2026 | 15:23
ԱԱԾ-ն հերքում է Մեղրիում ադրբեջանցիների լինելու լուրը // Ադրբեջաներեն երգ՝ Փաշինյանի տեսանյութում․ ԼՈՒՐԵՐ
Նեթանյահուն հայտնել է 60-օրյա զինադադարի ընթացքում մշտական հրադադարի պայմանը
Քաղաքականություն
11.07.2025 | 14:05
Իսրայելի վարչապետ Բենիամին Նեթանյահուն հայտարարել է, որ պատրաստ են բանակցել 60-օրյա զինադադարի ընթացքում Գազայում մշտական հրադադարի շուրջ, բայց միայն այն դեպքում, եթե պաղեստինյան տարածքն ապառազմականացվի, գրում է France 24-ը։
Իսրայելի և ՀԱՄԱՍ-ի պատվիրակությունները կիրակի Դոհայում անուղղակի բանակցություններ էին սկսել՝ փորձելով համաձայնության գալ պատերազմի ժամանակավոր դադարեցման շուրջ, որը սկսվել է զինյալ խմբավորման կողմից 2023 թվականի հոկտեմբերին իրականացված հարձակումից։ ԱՄՆ Մերձավոր Արևելքի հարցերով հատուկ ներկայացուցիչ Սթիվ Ուիթկոֆն առաջարկել է 60-օրյա հրադադար՝ Գազայում դեռևս 20 ողջ մնացած պատանդներից կեսի ազատ արձակման դիմաց։
«Այս հրադադարի սկզբում մենք կսկսենք բանակցություններ պատերազմի մշտական դադարեցման համար»,- ասել է Նեթանյահուն Վաշինգտոնից ուղղված տեսաուղերձում։
Նա նշել է, որ Իսրայելի «հիմնարար պայմաններն» են, որ «ՀԱՄԱՍ-ը վայր դնի զենքերը» և այլևս չունենա «կառավարման կամ ռազմական կարողություններ»։
«Եթե դրան կարելի է հասնել բանակցությունների միջոցով, լավ։ Եթե դրան հնարավոր չէ հասնել բանակցությունների միջոցով 60 օրվա ընթացքում, մենք դրան կհասնենք այլ միջոցներով՝ ուժով»,- շեշտել է Նեթանյահուն։
ՀԱՄԱՍ-ը չորեքշաբթի հայտարարել էր, որ համաձայնել է ազատ արձակել ողջ մնացած 10 պատանդի, սակայն հինգշաբթի պնդել, որ դեմ է գործարքին, որը կներառի Իսրայելի զգալի ռազմական ներկայություն Գազայի հատվածում։ Կազմակերպությունը նաև ցանկանում է օգնության անարգել հոսք Գազայի տարածք՝ մարդասիրական ճգնաժամը մեղմելու և «իրական երաշխիքներ» ապահովելու համար՝ երկարատև խաղաղության հասնելու նպատակով։
Իսրայելի վարչապետը ՀԱՄԱՍ-ին անվանել է «անգութ ահաբեկչական կազմակերպություն» և ասել, որ ցանկանում է ազատ արձակել բոլոր պատանդներին։
«Մենք ամեն ինչ կանենք, որպեսզի այս փուլում [ազատ արձակվածների թիվը] հնարավորինս մեծացնենք։ Ամեն ինչ չէ, որ մեր ձեռքերում է»,- հավելել է նա։
Թարգմանությունը՝ Էմմա Չոբանյանի
