Ֆիդանը չի բացառել Թուրքիայում Թրամփ-Զելենսկի-Պուտին հանդիպումը

Թուրքիայի արտաքին գործերի նախարար Հաքան Ֆիդանը հայտարարել է, որ Անկարան ուշադիր հետևում է ԲՐԻԿՍ-ի  զարգացումներին Ռիո դե Ժանեյրոյում կայացած կազմակերպության վերջին գագաթնաժողովից հետո: ԲՐԻԿՍ-ի առաջնորդների 17-րդ գագաթնաժողովից հետո թուրքական TRT Haber-ին տված հարցազրույցում նա ընդգծել է Թուրքիայի բազմակողմ արտաքին քաղաքականության մոտեցումը և անդրադարձել տարածաշրջանային հիմնական խնդիրներին, այդ թվում՝ Գազային, Ուկրաինային և Իրան-Իսրայել լարվածությանը, փոխանցում է Turkiye today-ը։

Թուրքիայի ԱԳ նախարաը կրկին կոչ է արել «դադարեցնել Գազայում ցեղասպանությունը»։

«Մենք մի քանի անգամ հանդիպել ենք նրանց հետ՝ նախքան ՀԱՄԱՍ-ը կպատասխաներ։ Մենք հայտնել ենք, որ պատրաստ ենք անել ամեն ինչ դիվանագիտական ​​լուծման համար, և որ կաշխատենք մեր դաշնակիցների հետ միասին։ Մեր ցանկությունն է, որ հրադադարը կյանքի կոչվի, մարդասիրական օգնությունը սկսվի որքան հնարավոր է՝ շուտ, և այս ցեղասպանությունը դադարեցվի»,- ասել է նա։

Ֆիդանը հիշեցրել է, որ Ռուսաստանի և Ուկրաինայի միջև խաղաղության հասնելու ամենամոտ պահը Ստամբուլի բանակցությունների ժամանակ է եղել։ Նա նշել է, որ Ռուսաստանը պատրաստ է բանակցությունների երրորդ փուլին, մինչ այդ, սպասվում է Ուկրաինայի պատասխանը։ Ինչ վերաբերում է առաջնորդների հնարավոր գագաթնաժողովին, Ֆիդանը կիսվել է վերջին զարգացումներով։

«Առաջնորդների գագաթնաժողովի նորությունն այն է, որ, ի տարբերություն նախկինում եղածի, բոլորը, այդ թվում՝ ՌԴ նախագահ Վլադիմիր Պուտինը, որևէ խնդիր չեն տեսնում իրենց ներկայիս գործընկերների հետ հանդիպելու հարցում: Սկզբունքորեն որևէ խնդիր չկա ԱՄՆ նախագահ Դոնալդ Թրամփի, Պուտինի, Ուկրաինայի նախագահ Վլադիմիր Զելենսկիի՝ մեր նախագահի հովանու ներքո հանդիպում անցկացնելու հարցում»,- հայտարարել է նա։

Հիշեցնենք, որ Թուրքիայի նախագահ Ռեջեփ Թայիփ Էրդողանը հայտարարել էր, որ ԱՄՆ նախագահ Դոնալդ Թրամփը պատրաստակամություն է հայտնել մեկնել Թուրքիա, եթե Ռուսաստանի նախագահ Վլադիմիր Պուտինը նույնպես ժամանի՝ Ուկրաինայի հարցով խաղաղության համաձայնության համար։

Թարգմանությունը՝ Էմմա Չոբանյանի