Լարված իրավիճակ ԱԺ-ում՝ Արթուր Սարգսյանի ելույթից հետո․ ՏԵՍԱՆՅՈՒԹ

ԱԺ-ն քննարկում է  «Հայաստան» խմբակցության պատգամավոր Արթուր Սարգսյանին  անձեռնմխելիությունից զրկելու և կալանավորելու՝ գլխավոր դատախազ Աննա Վարդապետյանի միջնորդագիրը։

Նիստում ելույթ ունեցավ Արթուր Սարգսյանը։ Նա հայտարարեց, որ ամեն ինչ որոշված է իրեն անձեռնմխելիությունից զրկելու և կալանավորելու հարցով։ Ընդդիմադիր պատգամավորը հավելեց՝ պատրաստվում է 4  անչափահաս երեխաների, կնոջ հետ գնալ եկեցեցի, մոմ վառել և ինքնակամ ներկայանալ Քննչական կոմիտե։

ԱԺ փոխնախագահ Ռուբեն Ռուբինյանն արձագանքեց. «Եթե ճիշտ եմ հասկանում՝ պարոն Սարգսյանը հրաժարվում է հարցերին պատասխանելուց: Հասկանալի որոշում է»:

Այդ ընթացքում դահլիճը լքող Արթուր Սարգսյանի և պատգամավորների միջև լեզվակռիվ սկսվեց, որը վերածվեց հրմշտոցի:

Աննա Վարդապետյանը երեկ տեղեկացրել էր, որ ըստ միջնորդագրում ներկայացված գաղտնալսումների՝ Արթուր Սարգսյանը Բագրատ արքեպիսկոպոս Գալստանյանի առաջնորդած «Սրբազան պայքար» անունը ստացած շարժման և այլ համախոհների հետ քննարկում է կազմակերպչական, պատրաստակամ ցուցարարների հավաքագրելու հարցեր, որ իրենց պատկերացրած սցենարն իրագործեն: Ըստ միջնորդագրի՝ քննարկում են անկարգություններ, խուլիգանություններ՝ ճանապարհները փակելու, երթևեկությունը կաթվածահար անելու, քաոս ստեղծելու սցենար:

Ըստ  Աննա Վարդապետյանի ներկայացրած միջնորդության՝ պատգամավորը շարժման համախոհների միջոցով հավաքագրել է մարդկանց՝ հարվածային, այսինքն՝ ակտիվ գործողությունների խմբերում ընդգրկելու համար:

Հավելենք, որ «Հայաստան» խմբակցության պատգամավորը Բագրատ արքեպիսկոպոս Գալստանյանի առաջնորդած շարժման ակտիվ մասնակիցներից է: Պայքարին միացել էր սկզբից՝ Տավուշից:

Հունիսի 26-ի առավոտյան հայտնի դարձավ, որ խուզարկություններ են սկսվել «Սրբազան պայքար» շարժման աջակիցների,  ՀՅԴ անդամների և «Հայաստան» խմբակցության պատգամավոր Արթուր Սարգսյանի տներում։ Քննչական կոմիտեն հայտարարեց, որ «Սրբազան պայքար» շարժման մասնակիցները և ղեկավարները պլանավորել էին ՀՀ-ում իրականացնել ահաբեկչական և իշխանությունը զավթելուն ուղղված գործողություններ։

Մանրաամասները՝ տեսանյութում։

Մանյա Պողոսյան