Թրամփը Տեխաս նահանգի Քեր շրջանում արտակարգ դրություն է հայտարարել

ԱՄՆ նախագահ Դոնալդ Թրամփն իր Truth Social էջում հայտարարել է, որ Տեխաս նահանգի Քեր շրջանում արտակարգ դրություն է հայտարարել։

Թրամփի խոսքով՝ այս միջոցառումը թույլ կտա անհապաղ անհրաժեշտ ռեսուրսները հատկացնել ջրհեղեղից առավել տուժած տարածքին։ Նա նշել է, որ շատ ամերիկացիներ չեն կարողացել փրկվել տարերքի մոլեգնության պատճառով, իսկ մյուսները անհետ կորել են, սակայն արտակարգ ծառայություններին հաջողվել է փրկել ավելի քան 850 կյանք։

Թարմփը հավելել է, որ իր վարչակազմը շարունակում է համագործակցել նահանգային և տեղական իշխանությունների հետ։

Հիշեցնենք՝ Տեխաս նահանգի Քեր շրջանում տեղի ունեցած ուժեղ հեղեղումների հետևանքով առնվազն 59 մարդ, այդ թվում՝ 15 երեխա, զոհվել է, հաղորդել է շրջանի շերիֆը։ Հարյուրավոր փրկարարներ շարունակում են որոնել անհետ կորածներին, որոնց թվում դեռևս 27 աղջիկներ են, որոնք հանգստանում էին ամառային ճամբարում։

Շաբաթ երեկոյան կայացած մամուլի ասուլիսի ընթացքում Քեր շրջանի շերիֆ Լարի Լիտան հայտնել է, որ այս պահին 850 մարդ փրկվել կամ տարհանվել է առանց վնասվածքների, ևս ութը՝ վնասվածքներ են ստացել։

Տեխասի մի շարք շրջաններում հայտարարվել է արտակարգ դրություն։ Շատ ճանապարհներ քանդված են, հեռախոսային կապը խաթարված է։

Փրկարարները շարունակում են որոնողական աշխատանքները Camp Mystic ճամբարում հանգստացող 27 աղջիկների հայտնաբերելու համար։ Ճամբարը գտնվում է Քերվիլ քաղաքից ոչ հեռու՝ Սան Անտոնիոյից մոտ 104 կմ հյուսիս-արևմուտք։ Լիտան ընդգծել է, որ գործողությունը չի դադարեցվի, մինչև բոլոր աղջիկներին չգտնեն։