Ամոնիակի արտահոսք ՌԴ-ի Ուստ-Լուգայի նավահանգստում

Ռուսաստանի Ուստ-Լուգա նավահանգստում (Լենինգրադի մարզ, Բալթիկ ծով) կիրակի՝ հուլիսի 6-ին, Eco Wizard ամոնիակ տեղափոխող տանկերում տեղի է ունեցել ամոնիակի արտահոսք։ Ինչպես հաղորդել է Ռուսաստանի տրանսպորտի նախարարությունը իր Telegram-ալիքում, խոսքը գնում է «աննշան հեղուկ ամոնիակի արտահոսքի» մասին, որը տեղի է ունեցել բեռնման ընթացքում։ Բեռնման գործընթացը շուտափույթ դադարեցվել է։ 23 հոգանոց անձնակազմը տարհանվել է և գտնվում է նավահանգստում, վիրավորներ չկան։

Տրանսպորտի նախարարության ճգնաժամային տեղեկատվական կենտրոնում տեղի է ունեցել արտակարգ խորհրդակցություն՝ նախարար Ռոման Սթարովոյթի գլխավորությամբ։ Հաղորդվում է, որ Բալթիկ ծովային փրկարարական ծառայության ուժերը լիարժեք պատրաստվածության վիճակում են՝ վթարային-փրկարարական աշխատանքների համար։ Նախատեսվում է նաև սուզակների կողմից նավի ստուգում։

Մի քանի ռուսական աղբյուրներ հայտնում են, որ տանկերում տեղի է ունեցել պայթյուն՝ ամոնիակի մղման աշխատանքների ժամանակ։ Պայթյունի հետևանքով ամոնիակատար նավի կորպուսում առաջացել են ճեղքեր, որոնց միջով սկսել է ջուր լցվել։ Eco Wizard նավը Ուստ-Լուգա է ժամանել Բելգիայից։

2025 թվականի սկզբից սա արդեն վեցերորդ տանկերն է, որը պայթյունի հետևանքով այս կամ այն կերպ տուժել է ռուսական նավահանգիստներ մուտք գործելուց հետո։ Նախորդ նման դեպքը տեղի էր ունեցել Vilamoura նավի վրա՝ Լիբիայի ափերի մոտ, երբ նավը տեղափոխում էր մոտ մեկ միլիոն բարել նավթ։