07.09.2026 | 23:24
Հայկական պտուղ-բանջարեղենի արտահանումը ԱՄԷ․ Պապոյանը քննարկել է ծավալների ավելացումը
Հիտլերի ծննդավայրում 2 փողոց կվերանվանեն, որոնք կրում են նացիզմի կողմնակիցների անունները
Քաղաքականություն
06.07.2025 | 17:25
Ավստրիայի Բրաունաու քաղաքում, որտեղ ծնվել է Ադոլֆ Հիտլերը, երկու փողոց կրում են նացիստական կուսակցության անդամների՝ կոմպոզիտոր Յոզեֆ Ռայթերի և դերասան Ֆրանց Ռեսլի անունները։ Քաղաքային իշխանությունները որոշել են փոխել այդ փողոցների անունները, փոխանցում է Euronews-ը։
Ինչպես հայտնում են տեղական լրատվամիջոցները, այս որոշումը կայացվել է չորեքշաբթի՝ քաղաքային խորհրդի «փակ քվեարկության» արդյունքում։ Խորհրդի 28 անդամ քվեարկել է «կողմ», 9-ը՝ «դեմ»։
Տեղական իշխանությունների կողմից հրապարակված զեկույցում նշվել է, որ նախկին անվանումների պահպանումը հակասում է երկրի Սահմանադրությանը։ Երբ բոլոր անհրաժեշտ վարչական քայլերը կձեռնարկվեն, մոտ 200 ընտանիք նոր հասցե կստանա։
Մաուտհաուզենի համակենտրոնացման ճամբարում տեղի ունեցածի մասին իրազեկման վրա աշխատող հատուկ կոմիտեն, որը տեղակայված է Բրաունաու քաղաքի մոտ, նշել է, որ այս քայլն ունի «խորհրդանշական նշանակություն»։ Ճամբարում զոհվել է առնվազն 90,000 կալանավոր, Հոլոքոսթի ժամանակ սպանվել է 65,000 ավստրիացի հրեա, իսկ 130,000-ը հարկադրված են եղել փախչել երկրից։
Կոմիտեն նշել է նաև, որ փողոցների անվանափոխությունն ի հիշատակ է այն ավստրիացիների, որոնք պայքարել են Հիտլերի ռեժիմի դեմ։
Արդեն երկար տարիներ բանավեճերի առարկա է նաև քաղաքում գտնվող այն տունը, որտեղ 1889 թվականին ծնվել է Ադոլֆ Հիտլերը և անցկացրել իր մանկությունը։
Չնայած այն հանգամանքին, որ այդ շինությունը տարբեր ժամանակներում ծառայել է որպես գրադարան, դպրոց և հոգեկան խնդիրներ ունեցող անձանց համար ապաստարան, այն շատ նեոնացիստների համար շարունակում է մնալ ուխտագնացության վայր։
