Քաղաքականություն
06.07.2025 | 19:35Հունաստանի վիզա ստանալու գործընթացն այս տարի որոշակի փոփոխություններ է կրել։ Ֆեյսբուքյան տարբեր խմբերում վերջին օրերին ակտիվորեն քննարկվում են դեպի Հունաստան զբոսաշրջության նպատակով մեկնելու ընթացակարգերի հետ կապված բարդությունները։ Որպես հիմնական խնդիր՝ նշվում է, որ գործընթացն ավելի երկար է տևում, մերժումների թիվն էլ աճել է։
Այս ֆոնին որոշ տուրիստական գործակալություններ սկսել են վերանայել դեպի Աթենք տուրերի կազմակերպման իրենց մոտեցումը։ Factor TV-ն կապ է հաստատել մի շարք գործակալությունների հետ. նրանցից մի քանիսը նշել են, որ շարունակում են կազմակերպել տուրեր դեպի Հունաստան, մինչդեռ որոշներն արդեն հրաժարվել են այդ ուղղությունից կամ բախվել են դժվարությունների։
Հունաստանի վիզայի համար դիմած քաղաքացիներից մեկը մեզ հետ զրույցում նշեց, որ երեք տասնյակից ավելի երկրում է եղել, երբեք վիզայի մերժում չի ստացել, նախորդն էլ բազմակի այցելության վիզա է եղել, սակայն դեսպանատան կողմից մերժում է ստացել։
Սոցիալական ցանցերի օգտատերերը նշում են՝ օր ամրագրելու գործընթացը ևս դարձել է ավելի բարդ։ Նշվում է, որ Հունաստանի դեսպանության մոտ որոշ դեպքերում կասկածներ են առաջանում ներկայացված փաստաթղթերի հետ կապված, ինչի հետևանքով մերժումները շատանում են։ Դեսպանատունը պաշտոնապես դեռևս չի արձագանքել բարձրաձայնված խնդիրներին։
Factor TV-ը փորձեց կապ հաստատել Հայաստանում Հունաստանի դեսպանատան և վիզաների կենտրոնի հետ, սակայն մեր զանգերն անպատասխան մնացին։ Այս ընթացքում օգտատերերը շարունակում են քննարկել վիզայի մերժման դեպքերն ու ժամկետների երկարաձգման հնարավոր պատճառները։
Մանրամասները՝ տեսանյութում։
Անի Թամրազյան
