16.07.2026 | 23:16
Պետական անտառներում հրդեհային անվտանգության վերահսկողությունը վերապահվել է էկոպարեկային ծառայությանը
Զախարովան ռուսներին կոչ է արել Ադրբեջան այցելելիս հաշվի առնել առկա իրավիճակը
Քաղաքականություն
02.07.2025 | 19:17
ՌԴ ԱԳՆ պաշտոնական ներկայացուցիչ Մարիա Զախարովան ամենշաբաթյա ճեպազրույցում անդրադարձել է Բաքվի ու Մոսկվայի միջև հարաբերությունների լարվածությանը՝ հիշեցնելով, որ Մոսկվայում Ադրբեջանի դեսպանը կանչվել է ԱԳՆ, նրան վճռական բողոք է ներկայացվել ։
Զախարովան ընգծել է, որ դեսպանին բողոք է ներկայացվել նաև «Sputnik Ադրբեջան»-ի աշխատակիցների ձերբակալման հետ կապված և պահանջ՝ անհապաղ ազատ արձակել նրանց։ Սակայն նրանց նկատմամբ ճնշումները շարունակվել են, աշխատակիցները կալանավորվել են 4 ամսով և Բաքվում ՌԴ հյուպատոսական ծառայությանը նրանց տեսակցելու հնարավորություն չի տրվում։
«Հուսով ենք՝ երկկողմ հարաբերությունները փչացնելու ցանկություն ունեցողները զերծ կմնան հետագա սադրիչ քայլերից։ Դրանք արդեն քիչ չեն եղել և լուրջ վնաս են հասցնում միջպետական հարաբերություններին։ Կոչ ենք անում ադրբեջանական կողմին միջոցներ ձեռնարկել՝ վերադառնալու միջպետական հարաբերությունների այն մակարդակին, որն առկա է պաշտոնական փաստաթղթերում։ Դա ռազմավարական գործընկերության մակարդակն է»,- հայտարարել է նա՝ նշելով, որ հարցերը պետք է լուծվեն գործընկերային կերպով։
Զախարովան նաև հայտարարել է՝ ՌԴ այն քաղաքացիները, որոնք գտնվում են Ադրբեջանում կամ ուղևորություն են ծրագրում, պետք է հաշվի առնեն ստեղծված իրավիճակը։ Ըստ ՌԴ ԱԳՆ ներկայացուցչի՝ Ադրբեջանում Ռուսաստանի դեսպանատունն ընդունում է զանգեր և պատրաստ է տրամադրել առկա տեղեկատվությունը Ադրբեջանում ձերբակալված Ռուսաստանի քաղաքացիների հարազատներին և մտերիմներին։
Թարգմանությունը՝ Էմմա Չոբանյանի
