ՄԱԳԱՏԷ-ի փորձագետները Իրանի կողմից միջուկային զենքի մշակման որևէ նշան չեն հայտնաբերել․ Գրոսսի

ՄԱԿ-ի մասնագետները որևէ նշան չեն հայտնաբերել, որը կփաստեր, որ Իրանի միջուկային ծրագիրը նպատակաուղղված է եղել միջուկային զենք ստեղծելուն, սակայն դրա մասին ամբողջական տեղեկատվություն առկա չէ։ Այս մասին հայտարարել է ՄԱԳԱՏԷ-ի գլխավոր տնօրեն Ռաֆայել Գրոսսին ամերիկյան CBS հեռուստաընկերությանը տված հարցազրույցում։

«Մենք չտեսանք, որ ծրագիրը նպատակաուղղված էր դրան, բայց միևնույն ժամանակ նրանք [իրանյան իշխանությունները] չպատասխանեցին տրված շատ-շատ կարևոր հարցերից մի քանիսին», – նշել է նա՝ պատասխանելով հարցին, թե արդյոք կա՞ն նշաններ, որ Թեհրանը պլանավորում է միջուկային զենք ստեղծել։

Գրոսսիի խոսքով՝ ՄԱԳԱՏԷ-ի մասնագետները «միշտ շատ անկեղծորեն են գնահատել իրավիճակը» Իրանի միջուկային ծրագրի շուրջ։ «Ես կարող եմ ձեզ վստահեցնել, որ շատերն էին ասում. «Դուք պետք է ձեր զեկույցում ասեք, որ նրանք [Իրանը] ունեն միջուկային զենք կամ շատ մոտ են միջուկային զենք ունենալուն»։ Իսկ  մենք դա չարեցինք», – հավելելով՝ «Մենք  դա պարզապես չարեցինք, որովհետև չտեսանք»։

Գրոսսիի խոսքով՝ գործակալության տեսուչները «ուրանի մասնիկներ էին հայտնաբերում Իրանի որոշ վայրերում, որոնք  հայտարարագրված վայրեր չէին»։ «Եվ մենք տարիներ շարունակ հարցնում էինք, թե ինչո՞ւ էինք մենք ուրանի մասնիկներ գտնում այս վայրերում ու հավաստի պատասխաններ չէինք ստանում», – ասել է  նա։

Հիշեցնենք, որ հունիսի 24-ին CNN-ը հաղորդել էր՝ ԱՄՆ հետախուզական համայնքը կարծում է, որ Իրանի վրա հարվածները չեն ոչնչացրել Թեհրանի միջուկային ծրագրի հիմնական բաղադրիչները։ ԱՄՆ հետախուզական նախնական գնահատականի համաձայն՝ հարձակումը, հավանաբար, Թեհրանի կողմից միջուկային ռումբի ձեռքբերումը հետաձգել է միայն մի քանի ամսով։ Այս եզրակացությունները պատրաստվել են ԱՄՆ Պաշտպանության հետախուզական գործակալության կողմից։

Իսկ հունիսի 25-ին ԱՄՆ նախագահ Դոնալդ Թրամփը և ԱՄՆ պաշտպանության նախարար Փիթ Հեգսեթը՝ հղում անելով ԱՄՆ հետախուզական նոր տվյալներին, վստահություն էին հայտնել, որ Իրանի Ֆորդոյի, Նաթանզի և Սպահանի միջուկային օբյեկտները, որոնց ԱՄՆ-ը հարվածել էր հունիսի 22-ի գիշերը, արդյունավետորեն ջնջվել են երկրի երեսից։ Բացի այդ, Սպիտակ տունը վստահեցրել էր, որ Վաշինգտոնին հասանելի տեղեկատվության համաձայն, Իրանը չի կարողացել նախապես դուրս բերել միջուկային նյութերը այդ համալիրներից։

Թարգմանությունը՝ Անահիտ Խաչատրյանի