Վլադիմիր Զելենսկին Ազատության շքանշանով պարգևատրել է Լեհաստանի նախագահ Անջեյ Դուդային

Լեհաստանի նախագահը շաբաթ առավոտյան անակնկալ այցով ժամանել է Կիև։ Վլադիմիր Զելենսկին նրան պարգևատրել է Ազատության շքանշանով՝ «Ուկրաինա-լեհական միջազգային համագործակցության ամրապնդման գործում ցուցաբերած բացառիկ անհատական վաստակի համար», հայտնում են լրատվամիջոցները։

Լեհաստանի նախագահի գրասենյակը սոցիալական ցանցերում հայտնել է, որ Անջեյ Դուդան ժամանել է Կիև շաբաթ առավոտյան՝ չհայտարարված այցով։ Ուկրաինայի արտաքին գործերի նախարար Անդրեյ Սիբիգան պարզաբանել է, որ այցի օրակարգում ներառված է հանդիպում Վլադիմիր Զելենսկու հետ և մասնակցություն Ուկրաինայի Սահմանադրության օրվա տոնակատարությանը։

«Նախագահ Դուդան Ուկրաինայի կողքին է եղել ռուսական լայնածավալ ագրեսիայի ամենածանր պահերին», – գրել է Սիբիգան X-ում՝ Դուդային նկարագրելով որպես «Ուկրաինայի իսկական բարեկամ»։

«Մենք երախտապարտ ենք նրան և լեհ ժողովրդին, ովքեր իսկական համերաշխություն ցուցաբերեցին Ուկրաինայի հանդեպ», – ավելացրել է ուկրաինական դիվանագիտության ղեկավարը։

Լեհաստանի ՆԳՆ-ն X հարթակում այսպես է արձագանքել իրադարձությանը. «Մենք համերաշխություն ենք հայտնում Ուկրաինային՝ հատկապես նրա ազատության և անկախության հերոսական պայքարի պայմաններում։ Մաղթում ենք, որ այն ժողովրդավարական արժեքները, որոնք դրված են Ուկրաինայի սահմանադրության հիմքում, հնարավորինս շուտ վերականգնվեն օկուպացված ուկրաինական տարածքներում»։

Սա Դուդայի առաջին այցը չէ Կիև՝ Ռուսաստանի կողմից Ուկրաինա ներխուժումից ի վեր։ 2022 թվականի ներխուժման նախօրեին նա Բալթյան երկրների նախագահների հետ այցելել էր Ուկրաինա, ինչպես նաև 2023 թվականի օգոստոսին՝ երկրի անկախության 33-րդ տարեդարձի տոնակատարությանը մասնակցելու։

Օգոստոսին ավարտվում է Անջեյ Դուդայի երկրորդ նախագահական ժամկետը։ Նորընտիր նախագահ Կարոլ Նավրոցկին հայտարարել է, որ պատրաստ է շարունակել աջակցել Ուկրաինայի պաշտպանությանը, սակայն դեմ է Կիևի անդամակցությանը արևմտյան դաշինքներին, այդ թվում՝ ՆԱՏՕ-ին։