13.01.2026 | 13:35
Ռուսական Տագանրոգում հարձակման է ենթարկվել ԱԹՍ-ների համար բաղադրիչներ արտադրող գործարանը
900 թիրախ, սպանված 11 գիտնական և 30 բարձրաստիճան պաշտոնյա․ Իսրայելն ամփոփել է Իրանին հարվածների վերաբերյալ տվյալները
Քաղաքականություն
27.06.2025 | 21:15
Իսրայելը հայտարարել է, որ «Առյուծի վերելքը» գործողության ընթացքում հարվածել է Իրանի ներսում գտնվող ավելի քան 900 թիրախի, գրում է CNN-ը։
Իսրայելի պաշտպանության ուժերի (IDF) տվյալներով, գործողության ընթացքում սպանել են միջուկային ոլորտի 11 գիտնականի և անվտանգության ոլորտի 30 բարձրաստիճան պաշտոնյայի, այդ թվում՝ երեք բարձրաստիճան հրամանատարի։ Ոչնչացվել է 200 հրթիռային կայանք, որոնք, ըստ Իսրայելի պաշտպանության բանակի, կազմում են Իրանի բոլոր հրթիռային կայանքների կեսը։
«Հարվածները նաև ոչնչացրել են ինքնաթիռ և հրթիռների արտադրության օբյեկտներ՝ այդպիսով կանխելով հազարավոր լրացուցիչ հրթիռների արտադրությունը», – ասվում է Իսրայելի պաշտպանության բանակի հայտարարության մեջ։
Ավելի վաղ՝ հինգշաբթի օրը, Իսրայելի պաշտպանության նախարարը Channel 13-ին տված հարցազրույցում հայտարարել էր, որ «Առյուծի վերելքը» գործողության ժամանակ Իրանի գերագույն հոգևոր առաջնորդ այաթոլլա Ալի Խամենեիին սպանելու հնարավորություն չի եղել, սակայն ասել էր, որ Իսրայելը «կվերացներ նրան», եթե նման հնարավորություն լիներ։
Հիշեցնենք, որ Իսրայելի ու Իրանի միջև հրադադարի մասին հայտարարել էր ԱՄՆ նախագահ Դոնալդ Թրամփը, որին հաջորդել էին կողմերի համապատասխան հայտարարությունները։
Թարգմանությունը՝ Էմմա Չոբանյանի
