06.10.2026 | 16:53
Գերմանիայի հետախուզական ծառայության նախկին ղեկավարը ձերբակալվել է լրտեսության կասկածանքով
Իրանը հայտնել է Թեհրանի մետրոյում «Մոսադի» լրտեսի ձերբակալման մասին
Քաղաքականություն
26.06.2025 | 14:15
Իրանի իշխանությունները հայտարարել են, որ Թեհրանի մետրոյում ձերբակալել են իսրայելական «Մոսադի» գործակալի՝ պնդելով, թե նա էլեկտրոնային չիպի միջոցով փոխանցել է զգայուն և ռազմական օբյեկտների գտնվելու վայրերը, փոխանցում է Iran International-ը՝ վկայակոչելով պետական IRIB-ին։ Տղամարդը ձերբակալվել է այն բանից հետո, երբ ոստիկանների համար կասկածելի են թվացել նրա տեղաշարժները։
Հաղորդագրությունում ասվում է, որ նա, ենթադրաբար, հրահանգներ է ստացել եբրայերենով և գտնվելու վայրի տվյալներ ուղարկել անհայտ կոնտակտների։ Նշվում է, որ կասկածյալը և նրա սարքավորումները հանձնվել են մասնագիտացված ոստիկանական ստորաբաժանումների՝ հետագա քննության համար։
Բացի այդ՝ հաղորդվում է, որ Իրանի իշխանությունները քրեական գործեր են հարուցել 47 քաղաքացու նկատմամբ«Իսրայելի հետ համագործակցության» մեղադրանքներով։ Այս մասին հայտարարել է Ֆարս նահանգի դատական իշխանության ղեկավարը։
Այս հայտարարությունը հաջորդում է ԱՄՆ-ում գործող HRANA մարդու իրավունքների խմբի զեկույցի հրապարակմանը, որտեղ նշվում է, որ Իրան-Իսրայել պատերազմի սկսվելուց ի վեր առնվազն 823 իրանցի քրեական հետապնդման է ենթարկվում քաղաքական կամ անվտանգության հետ կապված մեղադրանքներով։ HRANA-ի տվյալներով՝ նրանցից 286-ը ձերբակալվել է առցանց գործունեության համար, այդ թվում՝ Իրանի վրա Իսրայելի հարձակման մասին բովանդակություն տարածելու համար։
Նախօրեին էլ 6 մարդ մահապատժի էր ենթարկվել «Մոսադի» օգտին լրտեսելու և մահափորձի համար նախատեսված սարքավորումներ մաքսանենգ ճանապարհով Իրան տեղափոխելու համար։
Թարգմանությունը՝ Էմմա Չոբանյանի
