21.02.2026 | 10:27
Ստեփանծմինդա-Լարս ավտոճանապարհը փակ է կցորդով բեռնատարների համար
Ռուս սպան դատապարտվել է 18 տարվա ազատազրկման՝ Լեռնային Ղարաբաղում խաղաղապահների մահվան մասին փաստաթղթի լուսանկարի համար
Քաղաքականություն
25.06.2025 | 23:40
Եկատերինբուրգում Կենտրոնական շրջանային ռազմական դատարանը ռուս սպա Եվգենի Ալակաևին դատապարտել է 18 տարվա ազատազրկման՝ նրան մեղավոր ճանաչելով պետական դավաճանության և պետական գաղտնիք պարունակող տեղեկություններ անօրինական կերպով ստանալու մեջ:«Մեմորիալը» հայտնում է, որ զինվորականը ստիպված կլինի առաջին հինգ տարին անցկացնել բանտում, իսկ մնացածը՝ խիստ ռեժիմի ուղղիչ գաղութում, գրում է The Insider-ը։
Զինծառայողի դեմ գործը հարուցվել է 2023 թվականի սեպտեմբերի 20-ին Լեռնային Ղարաբաղում ռուս խաղաղապահների մահվան մասին տեղեկատվություն պարունակող փաստաթղթի լուսանկարի պատճառով, որը նա մեսենջերով ուղարկել է իր մորը և ընկերոջը՝ Ուկրաինայի հունա-կաթոլիկ եկեղեցու քահանա Կոնստանտին Միրոնովին, որը բնակվում է Իտալիայում։
Քննության վարկածով`փաստաթուղթը պարունակել էր գաղտնի տեղեկատվություն «խաղաղ ժամանակ հատուկ գործողությունների ընթացքում կրած կորուստների» մասին, և, բացի այդ, Ալակաևը, ենթադրաբար, այն ձեռք է բերել խաբեությամբ՝ ասելով, որ լուսանկարում է թուղթը իր վերադասների հանձնարարությամբ։
Ըստ հետաքննության` Ալակաևը Միրոնովի հետ նամակագրության մեջ քննարկել է Ուկրաինայում տեղի ունեցող պատերազմը և իբր փոխանցել է իր ծառայության շնորհիվ իրեն հասանելի տեղեկություններ, «ներառյալ պետական գաղտնիք կազմող և պաշտպանության ոլորտում ծառայողական գաղտնիք կազմող»։
Նշվում է, որ իրենց նամակագրության մեջ նրանք մանրամասն քննարկել են Ռուսաստանի կողմից Ուկրաինա ներխուժումը, ռազմական գործողությունների ընթացքը, կորուստները, պատերազմի վերաբերյալ իրենց փորձը և դատապարտել են Ռուսաստանի ղեկավարության քաղաքականությունը։
Լրատվամիջոցը գրում է, որ 2023 թվականի սեպտեմբերի 19-ին ադրբեջանական զորքերը սկսել էին ռազմական գործողություններ, որոնք ավարտվեցին Լեռնային Ղարաբաղի գրավմամբ և էթնիկ զտմամբ, որի ընթացքում ամբողջ հայ բնակչությունը ստիպված եղավ լքել տարածաշրջանը։
Սեպտեմբերի 20-ին ադրբեջանական զորքերը կրակ էին բացել ռուս խաղաղապահների մեքենայի վրա՝ սպանելով հինգ մարդու։ Ադրբեջանի իշխանությունները հայտարարել էին, թե որ ռուսներին սխալմամբ են ՝ հայ զինվորների տեղը դնելով։ 2024 թվականի գարնանը ռուս խաղաղապահները հեռացել են Լեռնային Ղարաբաղից։
Թարգմանությունը`Էմմա Չոբանյանի
