23.05.2026 | 18:52
«Ուժեղ Հայաստան» կուսակցության քարոզարշավը Արմավիրի մարզում. ՈՒՂԻՂ
Վրաստանում 3 ընդդիմադիր առաջնորդ դատապարտվել է ազատազրկման
Քաղաքականություն
23.06.2025 | 22:54
«Հզոր Վրաստան» և «Լելո» ընդդիմադիր կուսակցությունների հիմնադիրներն ու առաջնորդները՝ Մամուկա Խազարաձեն և Բադրի Ջափարիձեն, ձերբակալվել են, գրում է Эхо Кавказа-ն։
Ձերբակալությունը տեղի է ունեցել կուսակցության գրասենյակում, որտեղ այդ պահին գտնվել են նրանց կողմնակիցները, այլ ընդդիմադիր ուժերի ներկայացուցիչներ և Վրաստանի հինգերորդ նախագահ Սալոմե Զուրաբիշվիլին։
Թբիլիսիի քաղաքային դատարանը ընդդիմադիր քաղաքական գործիչներին դատապարտել էր ազատազրկման՝ խորհրդարանական քննիչ հանձնաժողովի նիստին չներկայանալու համար։ Դատարանի որոշման համաձայն՝ Խազարաձեն և Ջափարիձեն բանտում կանցկացնեն ութ ամիս։
Այսօր առավոտյան էլ «Փոփոխությունների համար կոալիցիայի» և «Գիրչի՝ ավելի շատ ազատություն» կուսակցության առաջնորդ Զուրաբ Ջափարիձեն դատապարտվել է յոթ ամսվա ազատազրկման։ Նա արդեն կալանքի տակ է։
Լրատվամիջոցը գրում է, որ խորհրդարանի հանձնաժողովի պաշտոնական նպատակն է հետաքննել նախորդ կառավարության կառավարման տարիներին կատարված հանցագործությունները։ Միևնույն ժամանակ, դրա մանդատը տարածվել է 2012 թվականից հետո տեղի ունեցած իրադարձությունների վրա։ Մասնավորապես, հանձնաժողովը քննարկում է նախկին վարչապետ Գիորգի Գախարիայի պատասխանատվության հարցը 2019 թվականին Չորչանա գյուղում ոստիկանական կետ տեղադրելու համար։
Մամուկա Խազարաձեն և Բադրի Ջափարիձեն կանչվել են խորհրդարանական հանձնաժողովի նիստին բիզնեսի վրա ճնշման գործը քննարկելու համար։
Մասնավորապես, «Մագնատի» ՍՊԸ-ի ղեկավար Ջեմալ Լեոնիձեն պնդում է, որ Խազարաձեի և Ջափարիձեի կողմից հիմնադրված TBC բանկի մասնակցությամբ իրենից անօրինական կերպով իր բիզնեսը խլել են։
Թարգմանությունը`Էմմա Չոբանյանի
