Զելենսկիի դեմ երկու մահափորձ է կանխվել․ Մալյուկը մանրամասներ է պատմել

Անցյալ տարի Ուկրաինայի նախագահ Վլադիմիր Զելենսկիի նկատմամբ մահափորձեր են տեղի ունեցել։ Հանցագործները ձերբակալվել են, այս մասին լրագրողների հետ զրույցում հայտարարել է Ուկրաինայի անվտանգության ծառայության ղեկավար Վասիլի Մալյուկը։

«Ձերբակալվածը գնդապետ է, Պետական ​​անվտանգության դեպարտամենտի ղեկավար։ Սրանք են այն անձինք, ովքեր պետք է պաշտպանեն այս երկրի բարձրաստիճան անձանց, և սա է նրանց գործառույթը։ Միևնույն ժամանակ, նրանք մահափորձ էին նախապատրաստում մեր նախագահ Վլադիմիր Զելենսկիի դեմ»,- ասել է նա։

Մալյուկը նշել է, որ մահափորձը պետք է իրականացնեին Ուկրաինայի նախագահի գրասենյակի տարածքում։

«Նրա հետ մեկտեղ ձերբակալվել է ևս մեկ գնդապետ։ Նրանք աշխատում էին Ռուսաստանի Դաշնության ԱԴԾ-ի, մասնավորապես՝ 5-րդ ծառայության համար։ Այդ ժամանակ այն ղեկավարում էր գեներալ-լեյտենանտ Բեսեդան։ Ի դեպ, այս ձախողումից հետո Պուտինը նրան ազատեց աշխատանքից, նա մնաց ԱԴԾ համակարգում խորհրդական։ Մեր կողմից դա շատ դժվար աշխատանք էր։ Մենք դա անում էինք գրեթե երկու տարի՝ ըստ էության, պատերազմի սկզբից ի վեր։ Մենք հզոր գործակալատեխնիկական ներթափանցում իրականացրինք այս խմբի մեջ։ Նախագահի դեմ մահափորձի կազմակերպումից բացի, նրանք հավաքագրում էին տեղեկատվություն, փոխանցում այն,  նախապատրաստում մահափորձ նաև իմ գործընկեր Կիրիլ Ալեքսեևիչ Բուդանովի և անձամբ իմ դեմ»,- պատմել է նա։

Մալյուկը հիշատակել է նաև մեկ այլ գործողության մասին։ «Ես կցանկանայի շնորհակալություն հայտնել Լեհաստանի Ներքին անվտանգության գործակալությանը։ Մենք շատ կարևոր  գործ ենք բացահայտել։ Մի թոշակառու զինվորական՝ լեհ, որը տասնամյակներ առաջ զորակոչվել էր, սրբորեն հավատում էր խորհրդային գաղափարին և տարիների ընթացքում սնուցում էր այդ մտադրությունը։ Հետևաբար, նրան ակտիվացրել էին», -ընդգծել է նա`նշելով, որ խնդիրն էր ֆիզիկապես վերացնել նախագահ Զելենսկիին լեհական Ժեշուվի օդանավակայանում։
«Դիտարկվում էին մի քանի տարբերակներ։ Դրանցից մեկը FPV անօդաչու թռչող սարքն էր, մյուսը՝ դիպուկահարը։  Մենք նրան ձերբակալել ենք։ Մեր լեհ գործընկերները պրոֆեսիոնալ կերպով աշխատեցին, սա մեր համատեղ աշխատանքն էր նրանց հետ», – հայտարարել է Մալյուկը։

Թարգմանությունը` Էմմա Չոբանյանի