05.12.2025 | 23:16
Հայաստանը նախապատրաստվում է Եվրոպական քաղաքական համայնքի գագաթնաժողովի հյուրընկալմանը․ քննարկվել են կազմակերպչական աշխատանքները
Էրդողանը հայտարարել է, որ Թուրքիան աշխատում է Իրանի դեմ «ավելի մեծ» հարձակումները կանխելու ուղղությամբ
Քաղաքականություն
23.06.2025 | 23:33
Թուրքիան մեծ ջանքեր է գործադրում, որպեսզի Իսրայելի կամ նրա աջակիցների կողմից Իրանի դեմ հարձակումները չվերածվեն «ավելի մեծ աղետի»։ Այս մասին հայտարարել է Թուրքիայի նախագահ Ռեջեփ Թայիփ Էրդողանը, գրում է Daily Sabah-ը։
Անկարայում «Մեմուր-Սեն» պետական ծառայողների արհմիության հիմնադրման տարեդարձին նվիրված միջոցառման ժամանակ ելույթ ունենալով՝ Էրդողանը քննադատել է Իսրայելի կողմից Իրանի դեմ սկսված պատերազմը, որն ընթանում է արդեն 11 օր։
«Թուրքիան երբեք չի արդարացնում Իրանի ինքնիշխանության կամ տարածաշրջանի անվտանգության դեմ ուղղված հարձակումները, անկախ նրանից, թե ում կողմից են դրանք գալիս, և մենք հստակ արտահայտում ենք մեր արձագանքը», – ասել է Էրդողանը։
Կիրակի օրը ԱՄՆ զինված ուժերը ռմբակոծել էին Ֆորդոյի, Նաթանզի և Սպահանի միջուկային օբյեկտները։
Շաբաթ օրը Ստամբուլում Իրանի ԱԳ նախարար Աբբաս Արաղչիի հետ հանդիպման ժամանակ Էրդողանը կոչ էր արել Իրանի և Միացյալ Նահանգների միջև տեխնիկական և ղեկավարության մակարդակով բանակցություններ սկսել լարվածությունը կարգավորելու համար։
Էրդողանը Արաղչիին ասել էր, որ Թուրքիան պատրաստ է ստանձնել միջնորդի դերը։ Ըստ նրա՝ տարածաշրջանը չի կարող հանդուրժել ևս մեկ պատերազմ և նշել, որ Իսրայելը պետք է «անհապաղ կանգնեցվի»։
Իսրայելաիրանական հակամարտության սկզբից ի վեր Էրդողանը մի շարք հեռախոսազրույցներ է ունեցել ԱՄՆ նախագահ Դոնալդ Թրամփի և Իրանի նախագահ Մասուդ Փեզեշքիանի հետ՝ առաջարկելով հանդես գալ որպես միջնորդ Իրանի միջուկային ծրագրի շուրջ բանակցությունների վերսկսման համար։
Իսրայելը և Իրանը օդային մարտերի մեջ են հունիսի 13-ից, երբ Թել Ավիվը անակնկալ հարձակում իրականացրեց Իրանի մի քանի օբյեկտների, այդ թվում՝ ռազմական և միջուկային օբյեկտների վրա, ինչին հաջորդեց Թեհրանի պատասխանը։
Իսրայելի իշխանությունները հայտարարել են, որ այդ ժամանակվանից ի վեր իրանական հրթիռային հարձակումների հետևանքով զոհվել է առնվազն 25 մարդ, կան հարյուրավորներ։ Իրանի առողջապահության նախարարության տվյալներով՝ Իրանում Իսրայելի հարձակման հետևանքով զոհվել է առնվազն 430 մարդ, վիրավորվել՝ ավելի քան 3500-ը։
Էրդողանը նաև վստահեցրել է, որ իր կառավարությունը ձեռնարկում է անհրաժեշտ միջոցներ 86 միլիոն թուրքերի անվտանգությունն ապահովելու համար։
Անցյալ շաբաթ նա հայտարարել էր, որ Թուրքիան պլանավորում է ավելացնել միջին և մեծ հեռահարության հրթիռների արտադրությունը։
Թուրքիայի ու Իսրայելի հարաբերությունները սրվել են Գազայում իսրայելական ռազմական գործողությունների պատճառով, որի հետևանքով Էրդողանը դարձել է Իսրայելի վարչապետ Բենիամին Նեթանյահուի ամենակոշտ քննադատներից մեկը։
Թարգմանությունը՝ Էմմա Չոբանյանի
