16.07.2026 | 23:29
Հետաքննությունը պարզել է, որ Ալիևի թոռներն անօրինական կերպով օգտագործում են պաշտոնական լիմուզիններն և անվտանգության մեքենաները
ԱՄՆ պետքարտուղար. «Իրանն խաբեց մեզ», դրա համար էլ Թրամփը ստիպված եղավ քայլեր ձեռնարկել
Քաղաքականություն
22.06.2025 | 20:08
ԱՄՆ պետքարտուղար Մարկո Ռուբիոն Fox News-ին հայտնել է, որ ԱՄՆ-ը Իրանին առաջարկել է թույլ տալ ունենալ քաղաքացիական միջուկային ծրագիր, սակայն «նրանք մերժեցին այդ առաջարկը»։
«Նրանք խաբեցին մեզ։ Նրանք չարձագանքեցին մեր առաջարկներին։ Տասը օր անհետացան։ Նախագահը ստիպված եղավ պատասխան քայլեր ձեռնարկել»,-ասել է նա։
Ռուբիոն կրկին շեշտել է իր տեսակետը, որ Իրանն երբեք միջուկային զենք չպետք է ունենա։ Նա նաև նախազգուշացրել է, որ Իրանի կողմից ցանկացած պատասխան գործողություն կլինի նրանց ամենամեծ սխալը։
«Մենք պատերազմ չենք հայտարարում Իրանին։ Մենք չենք փնտրում պատերազմ։ Բայց եթե նրանք հարձակվեն մեզ վրա, կարծում եմ՝ մենք ունենք հնարավորություններ, որոնք նրանք դեռ չեն տեսել»,-նշել է նա։
Այսօր առավոտյան Իրանի արտգործնախարար Աբբաս Արաղչին հայտարարել է, որ Իրանը երբեք չի հեռացել բանակցությունների սեղանից։ Նրա խոսքով՝ բանակցությունները խափանվել են իսրայելական հարձակումներով, որին հաջորդել են ամերիկյան հարվածները։
Հիշեցնենք՝ ԱՄՆ նախագահ Դոնալդ Թրամփը ավելի վաղ հայտարարել է, որ ամերիկյան ավիացիան հարվածներ է հասցրել Իրանում գտնվող երեք միջուկային օբյեկտներին՝ Ֆորդոյում, Նաթանզում և Սպահանում։
Ամերիկայի նախագահը նաև ուղերձով է հանդես եկել։ Իր ելույթում, որը տևել է երեք րոպե, Թրամփն ասել է, որ Իրանի ապագան կամ խաղաղություն է, կամ ողբերգություն, և կան բազմաթիվ այլ թիրախներ, որոնք կարող են խոցվել ամերիկացի զինվորականների կողմից: Նա հայտարարել է, որ եթե խաղաղության գործընթացն արագ տեղի չունենա, ապա ԱՄՆ-ն այլ նպատակներ է հետապնդելու՝ ճշգրտությամբ, արագությամբ և հմտությամբ:
