15.02.2026 | 15:31
Վիզայի տրամադրումից հետո վիզայի հետ կապված ստուգումները չեն դադարում․ ՀՀ-ում ԱՄՆ դեսպանատուն
ԱՄՆ-ը «պատերազմի վիճակում չէ Իրանի հետ». փոխնախագահ Վենս
Քաղաքականություն
22.06.2025 | 18:58
NBC News-ին տված կարճ հարցազրույցում փոխնախագահ Ջեյ Դի Վենսը հայտարարել է, որ ԱՄՆ-ը «Իրանի հետ պատերազմի վիճակում չէ»։
«Մենք պատերազմի մեջ ենք նրա միջուկային հավակնությունների դեմ»,-ասել է նա։
Վենսը հրաժարվել է հարյուր տոկոսով հաստատել, թե երկրի միջուկային օբյեկտները լիովին ոչնչացվել են։ Փոխարենը նշել է, որ ԱՄՆ-ին «հաջողվել է դադարեցնել» Իրանի միջուկային ծրագրի զարգացումը, և այժմ ԱՄՆ-ը և նրա դաշնակիցները կաշխատեն Իրանի միջուկային ծրագրի «վերջնական» ապամոնտաժման վրա։
Վենսն ավելացրել է նաև, որ այժմ նախագահ Դոնալդ Թրամփը հուսով է, որ հնարավոր կլինի գտնել հակամարտության դիվանագիտական լուծումը։
«Իրանցիները ակնհայտորեն լավ չեն պատերազմում։ Միգուցե արժե հետևել նախագահ Թրամփի խորհրդին և հնարավորություն տալ խաղաղությանը։ Եթե իրենք լուրջ են տրամադրված, ես ձեզ վստահեցնում եմ, որ ԱՄՆ նախագահն էլ է լուրջ»,-նշել է նա։
Հիշեցնենք՝ ԱՄՆ նախագահ Դոնալդ Թրամփը ավելի վաղ հայտարարել է, որ ամերիկյան ավիացիան հարվածներ է հասցրել Իրանում գտնվող երեք միջուկային օբյեկտներին՝ Ֆորդոյում, Նաթանզում և Սպահանում։
Ամերիկայի նախագահը նաև ուղերձով է հանդես եկել։ Իր ելույթում, որը տևել է երեք րոպե, Թրամփն ասել է, որ Իրանի ապագան կամ խաղաղություն է, կամ ողբերգություն, և կան բազմաթիվ այլ թիրախներ, որոնք կարող են խոցվել ամերիկացի զինվորականների կողմից: Նա հայտարարել է, որ եթե խաղաղության գործընթացն արագ տեղի չունենա, ապա ԱՄՆ-ն այլ նպատակներ է հետապնդելու՝ ճշգրտությամբ, արագությամբ և հմտությամբ:
