21.12.2025 | 22:02
Ֆուտզալի Հայաստանի հավաքականը հաղթեց Մոլդովային
Իրանը սպառնում է փակել Հորմուզի նեղուցը՝ ԱՄՆ-ի հարվածից հետո
Քաղաքականություն
22.06.2025 | 18:33
Իրանի իշխանությունները կրկին սպառնացել են փակել Հորմուզի նեղուցը, որի միջոցով իրականացվում է նավթի համաշխարհային առևտրի հինգերորդ մասը։ Այդ մասին հայտարարել են Իրանի զինվորականները կիրակի օրը՝ հունիսի 22-ին, այն բանից հետո, երբ ԱՄՆ-ն հարվածներ է հասցրել երկրի միջուկային օբյեկտներին։
Իրանական Press TV հեռուստաալիքը մեջբերել է պատգամավոր և գեներալ Իսմայիլ Քոսարիի խոսքերը, որը նշել է, որ Իրանի խորհրդարանը որոշում է ընդունել փակել նեղուցը։ Վերջնական որոշումը, նրա խոսքով, պետք է կայացնի Ազգային անվտանգության բարձրագույն խորհուրդը։ Թեև պաշտոնապես այն գլխավորում է Իրանի նախագահը, փաստացի այն ղեկավարում է գերագույն առաջնորդ այաթոլլա Ալի Խամենեին։
Հիշեցնենք՝ հունիսի 22-ին Հորմուզի նեղուցը փակելու սպառնալիքով հանդես է եկել նաև Իսլամական հեղափոխության պահապանների կորպուսի նավատորմի հրամանատար գեներալ Ալիրեզա Թանգսիրին։
«Եթե ագրեսիան մեր ինքնիշխանության դեմ շարունակվի, Հորմուզի նեղուցը լիովին կփակվի»,-նրան է մեջբերում Samaa հեռուստաալիքը։ Զինվորականը խոստացել է, որ այդ ուղին կարող է «փակվել մի քանի ժամում»։
Հորմուզի նեղուցով է անցնում համաշխարհային հեղուկացված բնական գազի 30%-ը և նավթի մինչև 20%-ը։ Նեղուցի ամենանեղ հատվածում լայնությունը ընդամենը 33 կմ է, իսկ նավարկելի ուղին՝ 3.7 կմ։
Reuters գործակալությունը մեջբերում է դանիական Maersk ընկերության հայտարարությունը, որը ծովային բեռնափոխադրումների խոշորագույն ընկերություններից մեկն է աշխարհում։ Ընկերությունը հայտնել է, որ իր նավերը շարունակում են անցնել Հորմուզի նեղուցով, սակայն իրենք ուշադիր հետևում են իրավիճակին։
Հիշեցնենք՝ ԱՄՆ նախագահ Դոնալդ Թրամփը ավելի վաղ հայտարարել է, որ ամերիկյան ավիացիան հարվածներ է հասցրել Իրանում գտնվող երեք միջուկային օբյեկտներին՝ Ֆորդոյում, Նաթանզում և Սպահանում։
Ամերիկայի նախագահը նաև ուղերձով է հանդես եկել։ Իր ելույթում, որը տևել է երեք րոպե, Թրամփն ասել է, որ Իրանի ապագան կամ խաղաղություն է, կամ ողբերգություն, և կան բազմաթիվ այլ թիրախներ, որոնք կարող են խոցվել ամերիկացի զինվորականների կողմից: Նա հայտարարել է, որ եթե խաղաղության գործընթացն արագ տեղի չունենա, ապա ԱՄՆ-ն այլ նպատակներ է հետապնդելու՝ ճշգրտությամբ, արագությամբ և հմտությամբ:
