08.12.2025 | 23:30
Իլոն Մասկը կոչ է անում «վերացնել» ԵՄ-ն. Եվրահանձնաժողովին արգելվել է X-ում գովազդներ տեղադրել՝ 120 միլիոն եվրո տուգանքից հետո
Հռոմի Պապ Լևոն XIV-ը պատերազմները դադարեցնելու համար կառավարիչներին պատասխանատվության կոչ է արել
Քաղաքականություն
22.06.2025 | 17:24
Հռոմի պապ Լևոն XIV-ը հայտարարել է, որ չափազանց անհանգստացած է Մերձավոր Արևելքում հակամարտության ընդլայնմամբ և կառավարիչներին պատասխանատվության կոչ է արել, հայտնում է Vatican News-ը։
«Տագնապալի լուրեր են ստացվում Մերձավոր Արևելքից, հատկապես Իրանից։ Այս դրամատիկ սցենարում, որը վերաբերում է նաև Իսրայելին և Պաղեստինին, տուժում է բնակչությունը, հատկապես Գազայում և այլ տարածքներում, որտեղ մարդասիրական օգնություն է անհրաժեշտ։ Այսօր առավել քան երբևէ հնչում է խաղաղության կոչը, մարդկության ճիչը, որը կոչ է անում պատասխանատվության և խոհեմության։ Դրանք չպետք է խլացվեն զենքով և հռետորական խոսքերով, որոնք միայն բորբոքում են հակամարտությունները։ Յուրաքանչյուր կառավարիչ բարոյական պատասխանատվություն է կրում, պետք է դադարեցնել պատերազմի ողբերգությունը, քանի դեռ այն չի դարձել անդառնալի կետ»,- ասել է պոնտիֆիկոսը Սուրբ Պետրոսի հրապարակում կիրակնօրյա աղոթքից հետո հավատացյալներին ուղղված իր խոսքում։
«Հեռավոր հակամարտություններ չկան։ Պատերազմը չի լուծում խնդիրները, այլ խորը վերքեր է առաջացնում ժողովուրդների պատմության մեջ։ Ոչ մի զինված հաղթանակ չի կարող բուժել մայրերի ցավը, երեխաների վախը և գողացված ապագան։ Դիվանագիտությունը պետք է գերակայի զենքին։ Ապագան պետք է կառուցվի խաղաղությամբ, այլ ոչ թե զենքի և բռնության կիրառմամբ»,- եզրափակել է պոնտիֆիկոսը։
Հիշեցնենք՝ ԱՄՆ նախագահ Դոնալդ Թրամփը ավելի վաղ հայտարարել է, որ ամերիկյան ավիացիան հարվածներ է հասցրել Իրանում գտնվող երեք միջուկային օբյեկտներին՝ Ֆորդոյում, Նաթանզում և Սպահանում։
Ամերիկայի նախագահը նաև ուղերձով է հանդես եկել։ Իր ելույթում, որը տևել է երեք րոպե, Թրամփն ասել է, որ Իրանի ապագան կամ խաղաղություն է, կամ ողբերգություն, և կան բազմաթիվ այլ թիրախներ, որոնք կարող են խոցվել ամերիկացի զինվորականների կողմից: Նա հայտարարել է, որ եթե խաղաղության գործընթացն արագ տեղի չունենա, ապա ԱՄՆ-ն այլ նպատակներ է հետապնդելու՝ ճշգրտությամբ, արագությամբ և հմտությամբ:
ԱՄՆ-ն իր հարվածներով «որոշել է պայթեցնել» Իրանի հետ միջուկային բանակցություններին վերաբերող դիվանագիտությունը, հայտարարել է Իրանի արտգործնախարար Աբբաս Արաղչին՝ մեկնաբանելով ԱՄՆ գիշերային հարվածները Իրանին։
X սոցիալական ցանցում հրապարակած հաղորդագրության մեջ Արաղչին ասել է, որ Իսրայելը տապալել է Թեհրանի և Վաշինգտոնի միջև բանակցությունները՝ հունիսի 13-ին Իրանի միջուկային օբյեկտների վրա իր հարվածներով, իսկ ԱՄՆ-ն նույնը արել է եվրոպական տերությունների հետ բանակցությունների դեպքում՝ կիրակի օրը իրականացրած հարվածներով։
Եվրոպացիների՝ Իրանին բանակցություններին վերադառնալու կոչերին ի պատասխան նա ասել է. «Իրանը ինչպես կարող է վերադառնալ մի բանի, որից երբեք չէր հեռացել»։
