Ադրբեջանում ՌԴ դեսպանը տպավորված է Ղարաբաղի «վերականգնման տեմպերից»

Բաքուն դիվանագիտական կորպուսի ներկայացուցիչների այց է կազմակերպել Լաչին։ Ադրբեջանական լրատվամիջոցների հաղորդմամբ՝  Ադրբեջանում հավատարմագրված դիվանագետների պատվիրակությունը, որի կազմում են ռազմական կցորդներ և երկրում գործող միջազգային կազմակերպությունների ղեկավարներ, առավոտյան ժամանել են տեղի միջազգային օդանավակայան։

100 դիվանագետներից բաղկացած պատվիրակությանն ուղեկցում է Ադրբեջանի նախագահի օգնական, նախագահի աշխատակազմի արտաքին քաղաքականության բաժնի ղեկավար Հիքմեթ Հաջիևը։

Այցի ընթացքում դիվանագետներին ծանոթացրել են միջազգային օդանավակայանի հնարավորություններին, նրանք շրջայց են կատարել քաղաքում, այցելել են Hoçazfilm կինոստուդիա և Yurd պատկերասրահ։

«Սա իմ երկրորդ այցն է Լաչին։ Ես այստեղ էի անցյալ տարի, և դա հրաշալի ուղևորություն էր։ Այն տեմպը, որով Ադրբեջանը վերականգնում է Ղարաբաղը, Լաչինը և այլ քաղաքներ, տպավորիչ է։ Եվ, իհարկե, այստեղ ստեղծվում են բոլոր պայմանները, որպեսզի ադրբեջանցիները ապրեն, հանգստանան և աշխատեն», – ադրբեջանական լրատվամիջոցներին ասել է Բաքվում ՌԴ դեսպան Միխայիլ Եվդոկիմովը։

Նա նշել է, որ հաճույքով է այցելում Ղարաբաղ։ «Ես եղել եմ Ֆիզուլիում, Շուշաում: Բնականաբար, հաճույքով  կայցելեմ  Ղարաբաղ և Ադրբեջանի մյուս շրջաններ»,-ասել է դեսպանը։

Ադրբեջանական լրատվամիջոցների  հրապարակած կադրերից երևում է, որ այցելուների թվում է նաև Բաքվում Ֆրանսիայի դեսպան Անն Բուայոն։

Թարգմանությունը՝ Էմմա Չոբանյանի