Էրդողանը Նեթանյահուին համեմատել է Հիտլերի հետ ու հայտարարել, որ Իրանն ունի օրինական իրավունք պաշտպանվելու

Թուրքիան կշարունակի անել ամեն ինչ դիվանագիտությունն առաջ մղելու և Իսրայելի հարձակումները դադարեցնելու համար։ Այս մասին հայտարարել է Թուրքիայի նախագահ Ռեջեփ Թայիփ Էրդողանը, գրում է Daily Sabah-ը։

«Մենք անում ենք ամեն ինչ, որպեսզի դադարեցնենք (Իսրայելի) անմարդկային ագրեսիան Գազայի, Սիրիայի, Լիբանանի, Եմենի և մեր հարևան Իրանի դեմ։ Մենք ուշադիր հետևում ենք Իսրայելի կողմից Իրանի դեմ իրականացվող ահաբեկչական հարձակումներին։ Մեր բոլոր հաստատությունները զգոն են այդ հարձակումների՝ Թուրքիայի վրա հնարավոր ազդեցության վերաբերյալ», – ասել է Էրդողանը՝ ելույթ ունենալով Անկարայում իշխող «Արդարություն և զարգացում» կուսակցության (ԱԶԿ) խորհրդարանական խմբակցության նիստում։

«Իրանի համար շատ բնական, օրինական իրավունք է պաշտպանվել Իսրայելի ավազակախմբերից և պետական ​​ահաբեկչությունից»,- ասել է Էրդողանը՝ կարծիք հայտնելով, թե «Իսրայելի վարչապետ Բենիամին Նեթանյահուն վաղուց գերազանցել է Հիտլերին»։

«Մենք հույս ունենք, որ նրանց ճակատագիրը նույնը չի լինի»,- ասել է Թուրքիայի նախագահը։

«Կոտորված խաղաղ բնակիչների, սպանված նորածինների և երեխաների արյունը ցողված է ոչ միայն նրանց ձեռքերին ու դեմքերին, ովքեր աջակցում են Իսրայելի ամբարտավանությանը, այլև նրանց վրա, ովքեր լռում են»,- նշել է նա՝ ընդգծելով, որ շարունակում են նախապատրաստվել բոլոր հնարավոր բացասական զարգացումներին։

Հունիսի 13-ին Իսրայելը լայնածավալ հարձակումներ սկսեց՝ թիրախավորելով Իրանի մի քանի քաղաքներում գտնվող միջուկային օբյեկտները, ինչպես նաև բարձրաստիճան ռազմական հրամանատարական կենտրոնները։

Իրանական լրատվամիջոցները չորեքշաբթի օրը հաղորդել են, որ Իսրայելի կողմից Թեհրանում և այլ բնակեցված տարածքներում իրականացված ավիահարվածների հետևանքով զոհերի թիվը հասել է 585-ը, վիրավորվել է առնվազն 1326 մարդ։

Ի պատասխան՝ Իրանի զինված ուժերը բալիստիկ հրթիռներ են արձակել Իսրայելի ուղղությամբ, որի հետևանքով, ըստ հաղորդագրությունների, զոհվել է 24 և վիրավորվել ավելի քան 500 մարդ։

Բազմաթիվ երկրներ, այդ թվում՝ Թուրքիան, դատապարտել են Իսրայելի գործողությունները։

Թարգմանությունը՝ Էմմա Չոբանյանի