ՍԴ-ն կարճել է անվճար իրավաբանական օգնության հարկման հարցով գործը

Սահմանադրական դատարանն աշխատակարգային որոշում է հրապարակել՝ կարճելով ՀՀ փաստաբանների պալատի նախագահ, փաստաբան Սիմոն Բաբայանի, փաստաբան Արամ Վարդևանյանի, Ազգային ժողովի պատգամավոր Արծվիկ Մինասյանի դիմումը՝ անվճար իրավաբանական օգնության հարկման հարցով։ ՍԴ-ն որոշում է կայացրել կարճել փաստաբանական ծառայություն մատուցողների հարկման ռեժիմի վերանայման մասով Հայաստանի Հանրապետության հարկային օրենսգրքում փոփոխություններ կատարելու մասին թիվ ՀՕ-285-Ն օրենքի 16-րդ հոդվածի 1-ին մասի՝ Սահմանադրությանը համապատասխանության հարցը որոշելու վերաբերյալ» գործի վարույթը։

Մերժման հիմքում Բարձր դատարանն ընդգծել է, որ անձի իրավական վիճակը բարելավող վերոնշյալ օրենսդրական կարգավորումն ուժի մեջ է մտել դիմողի կողմից վիճարկվող՝ անվճար իրավաբանական օգնության տրամադրումը ենթադրաբար սահմանափակող իրավակարգավորման՝ Օրենսգրքի 254-րդ հոդվածի 3-րդ մասի 3-րդ կետի` նոր խմբագրությամբ, ուժի մեջ մտնելու օրվանից՝ 2025 թվականի հունվարի 1-ից․

«Ուստի, 2025 թվականի մարտի 26-ին ընդունված՝ «Հայաստանի Հանրապետության հարկային օրենսգրքում լրացումներ և փոփոխություններ կատարելու մասին ՀՕ-72-Ն օրենքով ամրագրված վերոնշյալ իրավակարգավորումների համատեքստում՝ դիմողի կողմից բարձրացված առաջին հարցադրման՝ օրենսգրքի 254-րդ հոդվածի 3-րդ մասի 3-րդ կետի ենթադրյալ հակասահմանադրականության առնչությամբ ենթադրյալ սահմանադրաիրավական բովանդակություն ունեցող վեճը, ըստ էության, սպառվել է»։

Հիշեցնենք՝ նոտարների և փաստաբանների հարկերի բարձրացման մասին փոփոխությունները դեռևս նախագծի փուլում արդեն իսկ մեծ աղմուկ բարձրացրին։ Նախագիծը խնդրահարույց էին համարել և դիտողություններ ներկայացրել ինչպես Մարդու իրավունքների պաշտպանը, այնպես էլ ՀՀ արդարադատության նախարարությունը:
Թեև առաջ եկած դժգոհություններին, փաստաբանների գործադուլներին և բողոքի ակցիաներին, նախագիծն ընդունվեց և արդեն այս տարեսկզբից հավասար հարկման սկզբունք կիրառվեց փաստաբանական և նոտարական ծառայությունների ոլորտում։ 5 տոկոս շրջանառության հարկից տեղափոխություն եղավ ավելացված արժեքի հարկման դաշտ, ինչի հետևանքով փաստաբանական ծառայություններ մատուցողների համար ԱԱՀ-ն այսօր կազմում է 20, իսկ շահութահարկը՝ 18 տոկոս։

Նախորդ տարի Փաստաբանների պալատը դիմումներ ներկայացրեց ՀՀ նախագահին, ՄԻՊ-ին և պատգամավորներին՝ ՍԴ դիմում ներկայացնելու համար։

Ռոզա Վարդանյան