08.09.2026 | 11:31
Հանձնարարական եմ տվել. Երևանում մարզային տրանսպորտով չպետք է ուղևորափոխադրումներ իրականացվեն. Ավինյան․ ՏԵՍԱՆՅՈՒԹ
Իսրայելի հարվածներն «ուղղակի ազդեցություն» են ունեցել Նաթանզի ստորգետնյա ցենտրիֆուգների վրա․ ՄԱԳԱՏԷ
Քաղաքականություն
17.06.2025 | 21:08
Ատոմային էներգիայի միջազգային գործակալությունը երեքշաբթի օրը հայտարարել է, որ կարծում է Իրանի Նաթանզի հարստացման կայանի վրա Իսրայելի կողմից իրականացված օդային հարվածներն «ուղղակի ազդեցություն» են ունեցել կայանի ստորգետնյա ցենտրիֆուգային սրահների վրա։
Հարվածները Իսրայելի կողմից Իրանի դեմ սկսված օդային արշավի մի մասն են, որը թիրախավորում էր Իրանի ռազմական և միջուկային ծրագիրը։ Սա առաջին դեպքն է, երբ ՄԱԿ-ի միջուկային վերահսկող մարմինը գնահատել է Նաթանզի ստորգետնյա հատվածներում հարվածներից առաջացած վնասը, որը Իրանի միջուկային ծրագրի հիմնական հարստացման օբյեկտն է։
«Ուրբաթ օրվա հարձակումներից հետո հավաքված արբանյակային պատկերների շարունակական վերլուծության հիման վրա ՄԱԳԱՏԷ-ն բացահայտել է լրացուցիչ տարրեր, որոնք վկայում են Նաթանզի ստորգետնյա հարստացման սրահների վրա ուղղակի ազդեցության մասին», – նշել է գործակալությունը։
Վերգետնյա հարստացման կայանն արդեն ոչնչացվել էր, ինչպես նաև կայանը սնուցող էլեկտրական սարքավորումները։
Նախօրեին էլ ՄԱԳԱՏԷ-ի ղեկավար Գրոսսին BBC-ին ասել էր, որ Իրանի Նաթանզի ուրանի հարստացման գործարանի ցենտրիֆուգները «ծանր վնասվել են, եթե ոչ ամբողջությամբ ոչնչացվել» Իսրայելի հարվածների հետևանքով։
Գրոսսիի խոսքով՝ Նաթանզի ցենտրիֆուգների վնասը, հավանաբար, էլեկտրաէներգիայի անջատումների արդյունք է եղել, իսկ ատոմակայանի վերգետնյա մասը «ամբողջությամբ ոչնչացվել է» հարվածներից։ Ստորգետնյա դահլիճն էլ, որտեղ տեղակայված են ցենտրիֆուգները, անմիջականորեն չի վնասվել։
Նա հավելել էր, որ Սպահանի միջուկային կենտրոնի չորս շենք վնասվել է Իսրայելի հարվածներից, սակայն Ֆորդոյի ստորգետնյա ուրանի հարստացման գործարանը, կարծես, անվնաս է մնացել։
Հիշեցնենք, որ նախօրեին տեղի էր ունեցել ՄԱԳԱՏԷ-ի կառավարիչների խորհրդի արտակարգ նիստը։
Թարգմանությունը՝ Էմմա Չոբանյանի
