01.04.2026 | 23:17
ԵՄ առաքելության գործունեությունը կարևոր է Հայաստանի քաղաքացիների համար. ՀՀ նախագահն ընդունել է Սատու Կոյվուին
Նեթանյահուն հայտարարել է, թե Խամենեիի սպանությունը վերջ կդնի Իրան-Իսրայել հակամարտությանը
Քաղաքականություն
16.06.2025 | 21:42
Իսրայելի վարչապետ Բենիամին Նեթանյահուն հայտարարել է, որ Իրանի գերագույն հոգևոր առաջնորդ Ալի Խամենեիի սպանությունը «կավարտի հակամարտությունը» երկու երկրների միջև, այն բանից հետո, երբ ԱՄՆ նախագահ Դոնալդ Թրամփը, ըստ լուրերի, նրան կոչ է արել չանել դա։
«Դա չի սրելու հակամարտությունը, այլ վերջ է դնելու հակամարտությանը»,- ABC News-ի թղթակից Ջոնաթան Կարլին տված հարցազրույցում ասել է Նեթանյահուն`պնդելով, որ Խամենեին«նման է ժամանակակից Հիտլերին»։
Նեթանյահուն ասել է, որ իր երկիրն «անում է այն, ինչ անհրաժեշտ է», երբ նրան հարցրել են, թե արդյոք Իսրայելը կթիրախավորի Խամենեիին՝ նշելով, որ Իրանի կառավարությունը, ենթադրաբար, ծրագրել էր սպանել Թրամփին և իրեն։
Հիշեցնենք, որ նախօրեին Reuters-ը, երկու ամերիկացի պաշտոնյայի վկայակոչելով, հայտնել էր, որ վերջին օրերին Դոնալդ Թրամփը վետո է դրել Իսրայելի կողմից Իրանի գերագույն հոգևոր առաջնորդ այաթոլլահ Ալի Խամենեիին սպանելու ծրագրի վրա։
«Իրանցիները սպանե՞լ են մեկ ամերիկացու։ Ո՛չ։ Մինչև նրանք դա չանեն, մենք նույնիսկ չենք խոսի քաղաքական ղեկավարությանը հետապնդելու մասին»,- անանուն մնալու պայմանով ասել էր ԱՄՆ վարչակազմի բարձրաստիճան պաշտոնյան։
Ըստ աղբյուրների՝ իսրայելցիները հայտարարել են, որ իրենք ունեն Իրանի բարձրագույն հոգևոր առաջնորդին սպանելու տարբերակ, սակայն Թրամփը մերժել է այդ ծրագիրը։ Իսրայելի Ազգային անվտանգության խորհրդի ղեկավար Ցախի Հանեգբին էլ ասել էր, որ «Reuters-ի հաղորդումն այն մասին, որ ԱՄՆ-ը վետո է դրել Ալի Խամենեիի սպանության վրա, կեղծիք է»։
Թարգմանությունը՝ Էմմա Չոբանյանի
