Իսրայել-Իրան մարտերի ֆեյքերը․ իբր խոցված ինքնաթիռ, իբր միջուկային փորձարկում․ Փա՞ստ, թե՞ փուստ․ ՏԵՍԱՆՅՈՒԹ

Իսրայել-Իրան հակամարտության նոր փուլում երկու կողմերն էլ տարածում են և՛ ճշմարիտ, և՛ կեղծ, և՛ խեղաթյուրված տեղեկություններ։ Դրանց մի մասը հասնում է նաև հայկական լսարան։ Այդ տեղեկություններից մի քանիսը ստուգել ենք այսօր՝ նաև որոշակի պարզաբանող դիտարկումներ անելու միջոցով։

Մարտական գործողությունների առաջին օրն Իսրայելը թիրախավորել էր Իրանի միջուկային, ռազմական ենթակառուցվածքները, զինվորականների տները և այլն: Դրանցից մի քանիսում հարվածների հետքերն ուսումնասիրում ենք Planet Lab-ի արբանյակային լուսանկարներով։
Նաթանզի միջուկային կայանում երևում է առնվազն 5 հարվածի տեղ։ Հարձակումից երկու օր առաջ՝ հունիսի 11-ին, նշված տեղերում շինություններ էին։ Առաջին հարվածներից հետո՝ հունիսի 14-ի լուսանկարներում երևում է, որ այդ շինությունները քանդված են։ Շինությունների մեծ մասը, սակայն, կանգուն են։

Սպահանի միջուկային օբյեկտում նույնպես կան խոցման ապացույցներ, իսկ Արաքի օբյեկտում ակնհայտ փոփոխություններ չկան։ Նույնը վերաբերում է նաև օդանավակայաններին։

Մարտական գործողությունների ընթացքում՝ հունիսի 13-ին, նաև կեղծ տեղեկություններ տարածվեցին, թե Իրանն առաջիկա ժամերին պատրաստվում է միջուկային պայթյունի փորձարկում անել։ Սկզբնաղբյուրն X-ի մի էջ էր, որի կեղծ լինելն ակներև էր։ Չնայած դրան՝ տեղեկությունը տարածվեց, հասավ Հայաստան, հետո ջնջվեց։

Մարտական գործողությունների օրերին Իրանի մայրաքաղաքի տարբեր հատվածների հարվածներ են հասցվել։ Եվ տեղեկություններ են տարածվել, որ թեհրանցիները լքում են մայրաքաղաքը, քանի որ անվտանգ չեն զգում իրենց։

Տեսանյութերի իսկությունն առայժմ չենք կարող հաստատել, սակայն լուրը հաստատում են նաև Factor-ի աղբյուրները․ Թեհրանից իսկապես մարդկանց հոսք կա դեպի ավելի անվտանգ բնակավայրեր։

Մանրամասները՝ տեսանյութում։

Գարիկ Հարությունյան