Հայկ Սարգսյանը նոր ծնվել էր, ես ՊՆ ղեկավարի առաջին տեղակալն էի. Քոչարյան․ ՏԵՍԱՆՅՈՒԹ

Ես եղել եմ պաշտպանության նախարարի առաջ տեղակալ, երբ Հայկ Սարգսյանը նոր ծնվել էր։ Լրագրողների հետ զրույցում այս մասին հայտարարեց ԱԺ պաշտպանության և անվտանգության հարցերի հանձնաժողովի նախագահ Անդրանիկ Քոչարյանը՝ անդրադառնալով իր և ՔՊ-ական պատգամավոր Հայկ Սարգսյանի միջև հանձնաժողովի նիստում ծագած վեճին, որտեղ քննարկվում էր գումարի դիմաց զինծառայության ժամկետը կրճատելոի մասին Սարգսյանի նախագիծը։

Ըստ նրա՝ Հայկ Սարգսյանի ներկայացրած օրինագիծը ո՛չ զորակոչի խնդիրն է լուծում, ո՛չ էլ պայմանագրային ծառայության, այն ավելի շատ հարցեր է առաջացնում։

Պաշտպանության հանձնաժողովի նախագահի կարծիքով՝ պետք է օր առաջ ունենալ այնպիսի զինված ուժեր, որոնք կկարողանան պաշտպանել ժողովրդին։ Քոչարյանի կարծիքով՝ երեկվա հրթիռակոծություններից հետո այս օրինագիծը Հայկ Սարգսյանը պետք է հետ քաշեր։

«Օրինագիծը ստացավ բացասական եզրակացություն, դա նշանակում է, ըստ ԱԺ կանոնակարգ օրենքի, խորհրդի նիստում չի զեկուցվելու, բայց հեղինակը կարող է պնդել, որ սա լիագումար նիստում քվեարկվի և քննարկվի։ Բայց դրանից առաջ, ես համոզված եմ, խմբակցությունում կլինի ևս մեկ քննարկում։ ՔՊ խմբակցությունը պետք է կողմնորոշվի, եթե որոշվեց, որ այս նախագծին պետք է կողմ քվեարկվի, բնականաբար, խմբակցությունը կաջակցի այս նախագծին։ Բայց խմբակցության առաջին փակ քննարկումից հետո Հայկ Սարգսյանը նախաձեռնեց հանդիպում ՔՊ պատգամավորների հետ և, ինչքան ես իմացա, մեկ հոգի է մասնակցել այդ հանդիպմանը»,- նշեց նա։

Նշենք, որ զինծառայության վերաբերյալ իշխանական պատգամավոր Հայկ Սարգսյանի օրինագիծը, որով առաջարկվում է գումարի դիմաց բանակում ավելի քիչ ժամկետով ծառայել, ԱԺ պաշտպանության հարցերի հանձնաժողովում բացասական եզրակացություն չստացավ: Նախագծին կողմ էր 5, դեմ՝ 4, ձեռնպահ՝ 1 պատգամավոր: 

Մանրամասները՝ տեսանյութում։ 

Մանյա Պողոսյան