Քաղաքականություն
12.06.2025 | 22:46
Վրաստանի ներքին գործերի նախարարությունը երկրի հինգերորդ նախագահին տուգանել է 5000 լարիով՝ «Հավաքների և ցույցերի մասին» օրենքը խախտելու համար: Սալոմե Զուրաբիշվիլին ֆեյսբուքում հրապարակել է խախտման վերաբերյալ արձանագրությունը, որում նշվում է, որ նախկին նախագահը խախտումը կատարել է մարտի 3-ին: Այդ օրը նա մասնակցել է Մայրերի երթին, որն անցկացվել է՝ ի պաշտպանություն եվրոպամետ հանրահավաքների ժամանակ ձերբակալված ակտիվիստների: Երթը Ֆիլհարմոնիայի համերգասրահի մոտից շարժվել է դեպի Վրաստանի խորհրդարան, գրում է Эхо Кавказа-ն։
«Ինձ այսօր ակտիվիստ կնքեցին։ Եվ ես կանգնած էի այնտեղ, որտեղ պետք է կանգնած լինեին բոլոր մայրերը՝ խղճի բանտարկյալների մայրերի կողքին»,- գրել է նա սոցիալական ցանցերում։
2025 թվականի փետրվարին Վրաստանում ընդունվել են օրենսդրական փոփոխություններ, որոնք զգալիորեն խստացրել են Վարչական իրավախախտումների մասին օրենսգիրքը, «Հավաքների և ցույցերի մասին» օրենքը և Քրեական օրենսգիրքը: Մի քանի փոփոխությունների համաձայն՝ արգելվում է փակ տարածքներում և շենքերում հանրահավաքներ անցկացնելը և հրապարակային քննադատությունը՝ առանց այդ տարածքների սեփականատերերի համաձայնության։
Բացի այդ, արգելվում է փակել մայրուղիները, կամուրջները, թունելները, էստակադները, տրանսպորտային հանգույցները, երկաթուղիները, ինչպես նաև պետական քաղաքական պաշտոնյային կամ պետական ծառայողին ուղղված բանավոր վիրավորանքները նրանց գործունեության հետ կապված համարվում են վարչական իրավախախտում և այժմ ենթակա են խիստ պատժի։
Թբիլիսիի Ռուսթավելի պողոտայում բողոքի ակցիաների ժամանակ ճանապարհը փակելու համար ակտիվիստների նկատմամբ հարյուրավոր տուգանքներ են սահմանվել։
Թարգմանությունը՝ Էմմա Չոբանյանի
