Բաքվում ՌԴ դեսպանը հայտարարել է, թե «Ալիևի իմաստության և Պուտինի հետ նրա հարաբերությունների շնորհիվ խաղաղությունը վերականգվել է»

Ռուսաստանն աջակցում է Հարավային Կովկասում խաղաղությանը և պատրաստ է նպաստել Բաքվի ու Երևանի միջև հարաբերությունների կարգավորմանը։ Այս մասին հայտարարել է Ադրբեջանում ՌԴ դեսպան Միխայիլ Եվդոկիմովը  ադրբեջանական Baku TV-ին տված հարցազրույցում, որի ընթացքում ներկայացրել է Ադրբեջանի և Ռուսաստանի միջև համագործակցության զարգացման, ինչպես նաև Հարավային Կովկասում ստեղծված իրավիճակի վերաբերյալ իր տեսակետները։

«Ռուսաստանի համար շատ կարևոր է Կովկասում խաղաղության պահպանումը։ Ադրբեջանի նախագահ Իլհամ Ալիևի իմաստության և Վլադիմիր Պուտինի հետ նրա հարաբերությունների շնորհիվ այսօր այդ խաղաղությունը վերականգնվել է։ 2020-2023 թվականներին տեղի են ունեցել մի քանի կարևոր հանդիպումներ, որոնց ընթացքում Ադրբեջանի և Հայաստանի միջև ձեռք են բերվել համաձայնություններ։ Մենք ողջունում ենք դրանք և հետաքրքրված ենք երկու երկրների միջև հարաբերությունների կարգավորման գործընթացի շարունակմամբ»,- հտյտարարել է Եվդոկիմովը։

Նա նշել է, թե Մոսկվան պատրաստ է ձեռնարկել բոլոր անհրաժեշտ ջանքերը՝ Ադրբեջանի և Հայաստանի միջև խաղաղության հաստատման համար։

«Ռուսական կողմը կձեռնարկի և պատրաստ է ձեռնարկել բոլոր անհրաժեշտ ջանքերը՝ Ադրբեջանի և Հայաստանի միջև տրանսպորտային ուղիների զարգացման համար, որպեսզի ավարտվի երկու երկրների միջև սահմանի սահմանազատումը և այս հիանալի տարածաշրջանում վերջնական խաղաղություն հաստատվի»,- ասել է ՌԴ դեսպանը։

Եվդոկիմովն ընդգծել է, որ Բաքվի և Մոսկվայի միջև հարաբերություններն ակտիվորեն զարգանում են, ինչի մասին է վկայում այն ​​փաստը, որ անցյալ տարի Ադրբեջանի և Ռուսաստանի նախագահները հանդիպել են չորս անգամ, Պուտինը պետական ​​այց է կատարել Ադրբեջան, երկու երկրների վարչապետներն անցկացրել են երեք հանդիպում, և մշտական ​​կապ է պահպանվում փոխվարչապետեր Շահին Մուստաֆաևի և Ալեքսեյ Օվերչուկի մակարդակով։ Նա հավելել է՝ Ռուսաստանը և Ադրբեջանը մեծ ներուժ ունեն դաշնակցային հարաբերությունները զարգացնելու համար։

Թարգմանությունը՝ Էմմա Չոբանյանի