21.06.2026 | 19:02
Ջեյ Դի Վենսը հայտնել է Իրանի հետ բանակցություններում առաջընթացի մասին
Եվրոպայի խորհրդի գլխավոր քարտուղարը հունիսի 11-12-ը Հայաստան կայցելի
Քաղաքականություն
11.06.2025 | 10:16
Եվրոպայի խորհրդի գլխավոր քարտուղար Ալեն Բերսեն հունիսի 11-12-ը կայցելի Հայաստան։ Նա մի շարք հանդիպումներ կանցկացնի։ Եվրախորհրդի տարածած հաղորդագրության համաձայն՝ գլխավոր քարտուղարը կհանդիպի ՀՀ նախագահ Վահագն Խաչատուրյանի, վարչապետ Նիկոլ Փաշինյանի, Ազգային ժողովի նախագահ Ալեն Սիմոնյանի և արդարադատության նախարար Սրբուհի Գալյանի հետ։ Նա նաև հանրային դասախոսություն կկարդա և կհանդիպի ուսանողների հետ Երևանի պետական համալսարանում։
Նշվում է, որ այցը տեղի է ունենում Հարավային Կովկասի համար վճռորոշ ժամանակահատվածում։ Գլխավոր քարտուղարը կհաստատի Եվրոպայի խորհրդի աջակցությունը Հայաստանի և Ադրբեջանի միջև խաղաղության համաձայնագրի շուտափույթ ստորագրմանը՝ ուղերձ, որը նա անմիջապես փոխանցել է ՀՀ վարչապետ Նիկոլ Փաշինյանին և Ադրբեջանի նախագահ Իլհամ Ալիևին մայիսին Տիրանայում կայացած Եվրոպական քաղաքական համայնքի գագաթնաժողովի ժամանակ։
«Հայաստանի և Ադրբեջանի միջև խաղաղության բանակցությունները չափազանց կարևոր են։ Մենք պետք է համատեղ աշխատենք՝ տարածաշրջանային կայունության համար լավագույն հնարավոր որոշումները կայացնելու համար»,- ասել է նա։
Հաղորդագրությունում նշվում է նաև, որ նույնքան կարևոր է Եվրոպայի խորհրդի աշխատանքը՝ աջակցելու Հայաստանի ժողովրդավարական բարեփոխումներին: Հայաստանի համար իր 2023-2026 թվականների գործողությունների ծրագրի միջոցով, որի սկզբնական բյուջեն կազմում է 19 միլիոն եվրո, և նոր՝ 2.8 միլիոն եվրոյի արձագանքման փաթեթի միջոցով, Եվրոպայի խորհուրդը նպաստում է ինստիտուտների, մարդու իրավունքների պաշտպանության և փախստականների հոսքերին արձագանքող ընդունող համայնքների դիմադրողականության ամրապնդմանը։
Քանի որ 2026 թվականի գարնանը Հայաստանը պատրաստվում է հյուրընկալել Եվրոպական քաղաքական համայնքի 8-րդ գագաթնաժողովը, քննարկումները կկենտրոնանան նաև այն բանի վրա, թե ինչպես կարող է Եվրոպայի խորհուրդը նպաստել տարածաշրջանի դերի ամրապնդմանը Եվրոպայի ձևավորվող ժողովրդավարական անվտանգության ճարտարապետության մեջ։
Թարգմանությունը՝ Էմմա Չոբանյանի
