Քաղաքականություն
10.06.2025 | 11:16ԱԺ-ում «ՀՀ 2024 թվականի պետական բյուջեի կատարման մասին» տարեկան հաշվետվության նախնական քննարկումների ընթացքում լեզվակռիվ տեղի ունեցավ նիստը նախագահող ՔՊ խմբակցության պատգամավոր Ծովինար Վարդանյանի և «Հայաստան» խմբակցության պատգամավորներ Լիլիթ Գալստյանի ու Արմենուհի Կյուրեղյանի միջև։ Ընդդիմադիր պատգամավորը մի քանի դիտարկում արեց դպրոցաշինության մասին։
Լիլիթ Գալստյանի խոսքով՝ 5 տարում 40 դպրոցի շինարարություն է ավարտվել, մինչդեռ, ըստ Կառավարության ծրագրի, մինչև 2026 թվականը պետք է կառուցվի
300-500 դպրոց։
«Հիմա փորձում եք բանականության նվազագույն շեմը հաղթահարած պատգամավորներին ներշնչել, որ 460 դպրոց մեկ տարում կիրականացնե՞ք, լավ էլի»,- դիմելով ֆինանսների նախարարին՝ ասաց Գալստյանը:
ՔՊ-ական պատգամավոր Ծովինար Վարդանյանն արձագանքեց․ «Շինարարությունը վազքի մրցույթ չէ, որ ամեն հաջոդ քայլին տոկոս է ցույց տալիս, թե ինչքան անցար առաջ: Վերհիշեք, թե այսքան ժամանակ, երբ Դաշնակության ձեռքում էր կրթության
ոլորտը, ի՞նչ է արել Դաշնակցությունն այդ ոլորտի հետ»:
Ծովինար Վարդանյանը, սակայն, դաշնակցական պատգամավորին պատասխանի հնարավորություն չտվեց՝ պահանջելով անջատել խոսափողը։
Այնուհանդերձ, ընդդիմադիր պատգամավորը շարունակեց. «ՀՅԴ-ի օրոք կառուցվել է 110 դպրոց։ Դուք կեղծ տվյալներ եք հրապարակում, թույլ չեք տալիս պատասխանել։ Պետք չէ մոլորեցնել հասարակությանը»։
Այնուհետև լեզվակռիվը շարունակվեց Ծովինար Վարդանյանի և Արմենուհի Կյուրեղյանի միջև։
Մանրամասները՝ տեսանյութում։
Մանյա Պողոսյան
