«Եթե նա դա անի, ստիպված կլինի պատասխան տալ»․ Թրամփը զգուշացրել է Մասկին

ԱՄՆ նախագահ Դոնալդ Թրամփը շաբաթ օրը հասկացրել է, որ հետաքրքրված չէ վերականգնել հարաբերությունները իր նախկին դաշնակցի և նախընտրական արշավի հովանավոր Իլոն Մասկի հետ՝ նախազգուշացնելով, որ նա կարող է բախվել «լուրջ հետևանքների», եթե փորձի աջակցել ընդդիմությանը։

NBC-ի Քրիստեն Ուելքերի հետ հեռախոսային հարցազրույցում Թրամփը նշել է, որ մտադիր չէ հաշտվել Մասկի հետ։ Երբ նրան հարցրել են՝ արդյոք իր հարաբերությունները միլիարդատեր Մասկի՝ Tesla-ի և SpaceX-ի գործադիր տնօրենի հետ ավարտված են, Թրամփը պատասխանել է. «Կարծում եմ՝ այո»։

«Ես չափազանց զբաղված եմ այլ գործերով։ Գիտեք, ես հաղթել եմ ընտրություններում մեծ առավելությամբ։ Ես նրան շատ արտոնություններ եմ տվել դեռ մինչև դա։ Ես նրան շանս եմ տվել իմ առաջին վարչակազմում և փրկել եմ նրա կյանքը իմ առաջին ժամկետի ժամանակ։ Ես մտադիր չեմ նրա հետ խոսել»,-ասել է նա։

Խոսակցություններ են շրջանառվում նաև, որ Մասկը կարող է իր աջակցությունը ցուցաբերել դեմոկրատներին։ ԱՄՆ նախագահը նախազգուշացրել է․ «Եթե նա դա անի, ստիպված կլինի պատասխան տալ դրա համար»,-ասաց Թրամփը, չմանրամասնելով, թե ինչ հետևանքների մասին է խոսքը։

Մասկի ընկերություններն ունեն բազմաթիվ շահավետ պետական պայմանագրեր։ Թրամփի մեկնաբանությունները հնչել են այն բանից հետո, երբ նրա և աշխարհի ամենահարուստ մարդու՝ Մասկի հարաբերությունները վատթարացան Թրամփի բյուջեի օրինագծի պատճառով, որը Մասկը քննադատեց իր սոցիալական հարթակում՝ X-ում։

Մասկը զգուշացրել է, որ օրինագիծը կհանգեցնի դաշնային բյուջեի պակասի աճին և այն անվանել է «զզվելի գարշելիություն»։ Կոնգրեսի տվյալներով՝ օրինագիծը կկրճատի ծախսերն ու հարկերը, բայց միևնույն ժամանակ 10.9 միլիոն մարդ կմնա առանց բժշկական ապահովագրության և կավելացնի դեֆիցիտը 2.4 տրիլիոն դոլարով մեկ տասնամյակի ընթացքում։

Հինգշաբթի օրը Թրամփը քննադատել է Մասկի կտրուկ արձագանքը իր «մեծ ու գեղեցիկ օրինագծի» վերաբերյալ, որն այժմ քննարկվում է Կոնգրեսում։ Շուտով Թրամփը և Մասկը սկսեցին փոխադարձ կոշտ հարձակումներ սոցիալական ցանցերում, ինչի արդյունքում Սպիտակ տունը և հանրապետական առաջնորդները սկսեցին շտապ գնահատել հետևանքները։

Մասկը նույնիսկ առաջարկել է Թրամփին իմփիչմենթ հայտարարել և առանց ապացույցների պնդել է, թե կառավարությունը թաքցնում է տեղեկատվությունը Թրամփի և հայտնի մանկապիղծ Ջեֆրի Էփշթեյնի կապերի մասին։ Ավելի ուշ Tesla-ի ղեկավարը, կարծես, հրաժարվել է այդ հայտարարություններից՝ շաբաթ օրը ջնջելով իր գրառումը Էփշթեյնի մասին։

ԱՄՆ փոխնախագահ Ջեյ Դի Վանսը նշել է, որ օրինագծի հիմնական նպատակը ծախսերի կրճատումը չէ, այլ 2017 թվականին Թրամփի առաջին ժամկետի ընթացքում հաստատված հարկային արտոնությունների երկարաձգումը։

«Սա լավ օրինագիծ է, թեպետ և ոչ կատարյալ»,-նշել է նա։